بديوي الوقداني العتيبي

[محمد بن دوهان]

بسـم الله الرحمن الرحيم
أعـز خلق الله، السـلام عليـكم ورحـمة الله وبركــاته...

شاعرنا في هذه الصفحة هو الشاعر الـمشهور بديـوي الـوقداني العتيـبي وهو من أشهر شعراء عصره حيث قال في بعض قصائده :


أيـامنا والليـالي كـم نعاتبـها=شبنا وشابت وعفنا بعض الأحوالي
تاعد مواعيد والجاهل ما يكذبها=واللي عرف حدها من همها سالي
إن اقبلت يوم ما تصفي مشاربـها=تقفي وتقبل وما دامت على حالي
في كل يوم تـورينا عـجايبـها=واليوم الأول تراه أحسن من التالي
أيـام في غلبـها وايـام نغلبـها=وايـام فيـها سوى الدهـر ميالي
جربت الايام مثل من يجربـها=تجريب عاقل وذاق المر والحالي
نضحك مع الناس والدنيا نلاعبها=نمشي مع الفي طوع حيثما مالي
كم من علوم وكم آداب نكسبها=والشـعر مازون مثقالٍ بـمثقالي
اعرف حروف الهجا بالرمز واكتبها=عاجل ومجنون حاويٍ كل الاشكالي
لاشك حظي ردي والروح متعبها=ما فادني حسن تأديبي مع أمثالي
إن جيت أبي حاجةٍ عَزّت مطالبها=العفو ما أحدٍ من الـمخلوق يا والي
قوم اليا جيتهم رفت شواربها=بالضحك وقلوبها فيها الردى جالي
وقوم اليا جيتها صكت حواجبها=وابدت لي البغض في مقفاي واقبالي
ما كنّـي إلا مسوي حال مغضبها=والكل في عشرتي مَاكر ودجالي
ياحيف تخفي أمور كنت حاسبها=واللي علا بالهم كله على بالي
الجار جافي وكم قوم ٍ نحاربها=والأهل واصـحابنا والدون والعالي
والروح وش عذرها في ترك واجبها=راح الحسب والنسب في جمع الاموالي
نفسي تبي العز والحاجات تغضبها=ترمي بها بين أجاويد وانذالي
المال يحيي رجال لا طباع لهم=كالسيل يحيي الهشيم الدمدم البالي
عفت المنازل وروحي يوم اجنبها=منها غنيمة وعنها البعد اولالي
لا خير في ديرة يشقى العزيز بها=يمشي مع الناس في هم واذلالي
دارٍ بها الخوف دام ما يغايبها=والجوع فيها معه من بعض الاحوالي
جُوْعاً سراحينها شبعاً ثعالبها=الكلب والهر يقدم كل ريبالي
عز الفتى راس ماله من مكاسبها=يا مرتضي الهون لا عزٍ ولا مالي
دللت بالروح لين ارخصت واجبها=وانا عتيـبي عريب الجد والـخالي
قومٍ تدوس الأفاعي مع عقاربـها=لـها عزايـم تـهد الشامـخ العالي
كب الـمنازل وقل للبين يندبـها=تبكي عليها بدمع العين هطالي
لا تعمر الدار والقاله تخربها=بيع الردى بالخسارة واشتر الغالي
ما ضاقت الأرض واشتبت شبايبها=مع كل حر مشهر في راس ماطالي
دارٍ بدارٍ وجيرانٍ نقاربها=وأرض بأرض وأطلال بأطلالي
والناس اجانيب لين انك تصاحبـها=تكون منـهم كما قالوا بالامثالي
الأرض لله نمشي في مناكبها=والله قدر لنا أرزاق وآجالي
حث المطايا وشرقها وغربها=واقطع بها كل فج دارسٍ خالي
إطعن نحور الفيافي مع ترايبها=وابعد عن الهم تمسي خالي البالي
من كل عمليّة تقطع براكبها=فدافد البيد درهامٍ وزرفالي
تبعدك عن دار قوم ودار ٍتقربها=واختر لنفسك للمنزال مغزالي
لو مت في ديرة قفراً جوانبها=فيها لوطا السباع القبس مدهالي
اخير من ديرة يجفاك صاحبها=كم ذا الجفا والتجالي والتحلالي
دس المخاطر ولا تخشى عواقبها=الموت واحد ولا عند الحذر جالي
إن المنية إذ مست مخالبها=تدرك لو كنت في جو السما عالي
ما فرة الأسد في عالي مراقبها=تسعى للارزاق ما حنت للاشبالي
والشمس في برجها والغيم يحجبها=تقفي وتقبل لها في الفلك مجدالي
رب السموات يا مجري كواكبها=يا مجري السفن في لجات الاهوالي
ضاقت بنا الارض واشتبت شبايبها=والغيث محبوس يا معبود يا والي
يالله من مزنة هبت هبايبها=رعادها بات له في البحر زلزالي
ريح العوالي من المنشا تجاذبها=جذب الدّلي من جبا مطوية الجالي
ديمومة سلبت وارخت ذوايبها=وانهل منها غزير الوبل همالي
تسقى ديار عزيز الوقت حاربها=ما عاد فيها لبعض الناس منزالي
يا جاهل اسمع تماثيلٍ امرتبها=فيها معاني جميع القيل والقالي
شبه الدنانير تزها في قوالبها=في صرفها زايد عن قرش واريالي
يا ربي توبه وروحي لا تعذبها=بيوم القيامة إذا ما ضاقت اعمالي
وازكى صلاة على المختار نوهبها=شفيعنا يوم حشر فيه الاهوالي

ومـما ينسب للشاعر بديـوي الـوقداني أيضاً:

يتبع بمشيئته تعالى ...

[سليمان الخرس]

لاشك حظـي ردي والـروح متعبهـاما فادني حسن تأديبـي مـع أمثالـي
إن جيت أبي حاجةٍ عَـزّت مطالبهـاالعفو ما أحدٍ من المخلوق يـا والـي




ننتظر منك تكلمة هذا الابداع

صح بدنك ياابن دوهان وصح الله لسان الشاعر

[محمد بن دوهان]

هلا بك اخوي سليمان وشاكر لك مرورك العذب اللبق .

أمّـا بديـوي الوقداني العتيبي فلقد قال رحمة الله عليه :


هاض شوقي حمام في الغصون=بات ساجع في بديعات الفنون
بين تغريد وترجيع بهون=ما درى اني في الهوا مثل العليل
يا حمام الدوح هيجت الغرام=ما سبب نوحك ومالك من مرام
اعطني عهدك وخذ مني ذمام=بيعني شوقك وخذ شوقي بديل
إن في قلبي جروح ٍ لا تطيب=ما بدت حتى يداويها الطبيب
من هواجس جات من فرقا الحبيب=باح مكنوني وصبري مستحيل
كلما هب الصبا قلبي صبا=لي غزال في الحما فلق الظبا
ظبي جازن يرتعي نبت الربا=يسلب العقال بالطرف الكحيل
ما لعيني بالتجافي والصدود=ما بقي غير الحسايف والوجود
كم رعيت النجم والعالم رقود=والمحاجر دمعها الصافي يسيل
زارني طيفه كما لطف النسيم=جدد الاشواق والعهد القديم
وانثنى في داجي الليل البهيم=قلت زدني قال يكفيك القليل
آه من همٍ سرا في القلب نار=وإن طلبت الصبر ما القى له قرار
كيف صبري والحشا للهم دار = صار مالكني وأنا عبده نزيل
قمت مما همني عند الهجوع=يوم كل نام ولعت الشموع
والهواجس جاتني تمشي جموع=مثل ورد النحل في واد طفيل
أو كما سيل تزايد من مضيق=يقلع الحصيان والسد الوثيق
ياخذ الاشجار ويسد الطريق=زاد عن حده وضاق ابه المسيل
طار نومي يوم نامت كل عين=بت ساهر مع نجوم الفرقدين
من هواجس من جفا من جور دين=ما بقي إلا البعد عنها والرجيل
صوب أرض الشام أو أرض العراق=كل يوم فيه ينحل الوثاق
كم بقاسي والقسا مر المذاق=ربما يلقى عن المنزل بديل
دع بلاد الذل وارحل يالبيب=واغترب فالكل بالدنيا غريب
القضا مكتوب والداعي نصيب=اركب الاخطار والهول المهيل
وان جفتك الدار ومال الزمان=لا تعيش بدار ذل أو هوان
لو يظَلي نبتها من زعفران=صاحب الاخطار واجعلها دليل
شد عن ارض الاعادي والحسود=واطلب العليا وبالغ بالجهود
لو يكون العز في غاب الاسود=خير من دار تعيش بها ذليل
كل من رام العلا يرقا لها=سلم الاخطار في اهوالها
من تراخت عزمته ما نالها=دونها ما يقصر الباع الطويل
اقطع البيدا على عوج النضا=لو يكون تمشي على جمر الغضا
ما يفوت العمر قدام القضا=دين عندك لين يآتيك العميل
عاشر الاحرار من اهل الرتب=تستفيد العقل منهم والأدب
جيث هم أهل المروة والنسب=واترك الأسفال ما منهم حصيل
سل عن الجيران قدام النزول=وان سمعت الناس تهرج لا تقول
تنكسي ثوب العزة والقبول=والخلايق يذكرونك بالجميل
كم كلام راح من أجله نفوس=وانت ما تاخذ على نقله فلوس
لا تفتش كل حَبٍّ فيه سوس=كم تخوض الناس في قال وقيل
صون عرضك عن املاقات السفيه=واترك الكذبان سودان الوجيه
من حكى عنهم يعود الكذب فيه=كيف تاخذ هرج من بابة هبيل
اترك البيت الردي وانص الرجال=خذ عريب البيت من أبٍ وخال
يوم تنظر في ولدها كالهلال=وان مشى بالدرب ما يغوا الدليل
خذ عزيز البز من زين القماش=والردى لو كان يعطونك بلاش
ما يفيدك كيف تاخذ شي ماش=بيعة المغبون فيها يستقيل
دور الطيب ولو غالي الثمن=لو يكون القصد في صنعا اليمن
لا يغرك صقلة الوجه الحسن=ابذل المجهود بالمال الجزيل
الذهب ما يخلطونه بالنحاس=غير بعض الناس ما عنده اقياس
خذ نصايح ما حواها بو نواس=مثل نظم الدر واللولو الأصيل
وان ملكت المال لا تعدو شحوح=اطعم الجيعان واكسي كل روح
الدبش والمال لابده يروح=والثنا والمجد جيل بعد جيل
هم روحك واغتنم عصر الشباب=إن للايام ميلٍ وانقلاب
وانت فيها تنطوي طي الكتاب=لا تغرك صحة العمر الطويل
اترك الدنيا اليا جاتك ضحوك=لا تغرك بالملاعب والتروك
كم غرق فيها وكم غرت ملوك=ضحكها اغرار ما اسرع ما تزيل
والعدو لا تامنه ولو بعد حين=لو حلف بالبيت والركن اليمين
الحقد والبغض في قلبه دفين=وان ضحك بالوجه في قلبه غليل
خل عنك الكِبر فالله الكبير=لا اتحاقر عاجزٍ والا فقير
واعلم ان الامر لله الخبير=يقصم الجبار ويعز الذليل
كم فقير مات قدام الممات=موت بعض الناس أخير من الحياة
إن بكن أو ما بكن النايحات=البكا خِسران في بعض الهزيل
وألف صلوا ما سجع بالاشتراك=ساجع القمري على غصن الاراك
في رياض علّها نو السماك=كل يوم الركب له فيها مقيل
تبلغ المختار والصحب النجول=ما سعى أو طاف بالبيت البقول
والمصاحف والكواكب والتلول=والحصا والرمل ميل بعد ميل

أتـمنى أنـها تـحوز على رضـا ذائقتكـم الكريـمة اخواني الأعزاء

ودمتـم برعاية الرحـمن وحفـظه

اخــوكــم

أبـو عبدالعــزيــز