بمناسبة الامسيه الشعريه والذي القاها الامير خالد الفيصل في دولة الكويت

[صالح بن عوج الزواي]

اما هذه القصائد في مناسبة الامسيه الشعريه الى صاحب السمو الملكي:: الامير خالد الفيصل
بعد تحرير دوله الكويت

القا فيها قصائد على مستوى الامسيه الذي اقامها في الكويت واخر قصيده
اعتزا في قبيلته الا وهي قبيله عنزه وقال في شطر بيت


ياصباح وياسعود الينتخيت ** عزوتك عناز راع الطايلات

في هذا البيت كانه فتح باب على نفسه من البعظ من قبائل عنزه سواء بالكويت او بالسعوديه لان الذي في الكويت والذي لا يحملون الجنسيه يعتبرون بدون والفيئه الثانيه والذي في السعوديه يعتبرون نازحين وهذا الذي اهاظة بها قريحة الشاعر :ذيب باقان الصقري العنزي
والذي يتشره بها الى الامير: خالد الفيصل .......... والذي يقول فيها



ياخالد الفيصل عليك انفتح باب ** ونت الذي مثلك يحس بخطاويه

وسمح لنا ياطيب الساس بعتاب ** وحنا نعاتب من نعزه ونغليه

ولاني لكم يادايم السيف سباب ** لاشك انا ليه عليكم مشاريه

بسم اعنزه نبديلكم بعض الاسباب ** وحنا الذي بقلوبنا مانخفيه

كان الصباحي والسعودي لنا قراب ** مفروض مانشكي الزمان وبلاويه

واليوم صرنا بينكم مثل الاغراب ** ومحد يبي اسم القبيله وطاريه

منفوعكم بس الاسامي واللقاب ** وحنا نازح بدون وشين سمعه وتشويه

ولون ابو تركي على القاع ماغاب ** مانشتكي ظيم الدهر مع بلاويه

ومادام حنا ونتم بني عم وقراب ** اهل الحفر شف وضعهم وبتصر فيه

حمايلن طاحت عجايز وشياب ** يرجون عطف الي عسا الله يخليه

تقطعت بوجيههم كل الاسباب ** الا من الي كل خلقه تراعيه

يالي تحلون المشاكل والأنشاب ** الحل وينه عشرة اسنين نرجيه

ويالي عطاياكم على كل الاجناب ** وعلى ابن عمك ليه قرطاس تغليه

يامير تعطون العطايا بلا حساب ** وظعيف وايل مالقا من يعشيه

وين الحميا ياعريبين الانساب ** حتا نصدق بالكلام ومعانيه

اما انفعو ولا افتحو لعنزه باب ** حتى أتعيش بالخليج ونواحيه

.................................................. .................................................. ....

ولاكن الخطاء الذي حصل من الاخ ذيب باقان بانه لم يعدها على الامير خالد بلسانه وبعد ماطبعة لم يسلمه له بيده وانما انتشرت القصيده في خلال اسبوع وطلعت الى السعوديه وقام شخص مجهول وكتب قصيده رد على قصيدت ذيب باقان باسم الامير خالد الفيصل ............. ويقول فيها


يالي تقول انه انفتح عليه باب ** وهرجن انتفوهبه ترا مانخفيه

نعم هلا العوجا عريبين الانساب ** عوق العديم الي عراضن علابيه

ونتم عنوزن مابكم قيل ماطاب ** ورديكم بالكون حامي تواليه

لاكنكم بالظيق رحتو للجناب ** نصيتو الخابور هو ونواحيه

وحنا رسينا لين كثرم الاحباب ** وكلن جانا يعدد الشايب ومغازيه

وحب الوطن بقلوبكم شبه مرقاب ** يرقاه من يرقاه ثمن يخليه

ياسرع والله عندكم قشع الاطناب ** تكفون وجه وعلى غير تاجيه

وحنا رسينا حتى انكم عدتم جماعات وسراب ** بسم النسب تبون منا مشاريه

اما اقعدو عندي على غير ماطاب ** ولا ارجعو لدياركم دون تشويه


.................................................. .................................................. ....


وهذا البيت الاخير يعتبر طرد ولاكن البعض من اعيان قبيلت عنزه لم يقنعو بهذه القصيده ولم يصدقو بانهاا من الامير خالد الفيصل على عمووم عنزه وبعد وصووول تلك القصيده المذكووره بعاليه الى الحدود الشماليه في عرعر وكانت في يد الشااعر عوده ابن زله الصقري العنزي فاقام وتجه الى امير منطقة الحدود الشماليه وعند وصوله وسلااامه عليه وبعد ترحيبه به نشده ماهي اخبارك يا ابن زله فرد عليه عوده ماعندي من الاخبار الى ان الامير خالد الفيصل اقام امسيه شعريه في الكويت وفي اخر الامسيه اعتزا بقيلته اعنزه وقام الشاعر ذيب باقان العنزي ووجه قصيده الى الامير خالد الفيصل ولم يعدها عليه بلسانه ولم يسلمها له بيده بعد طباعتها وبعد فترت اسبوع تقريبن جااء رد باسم الامير خالد الفيصل على العنزي والرد هذا نحنو لسنا مصدقين بانهو من الامير خالد الفيصل على عموم قبيلت اعنزه فرد الامير عبدالله على ابن زله وقال له وش تبي بالظبط يا ابن زله فقال عوده ابيك تتصل على الامير خالد وتنشده هل هذه القصيده منه فقام الامير واتصل على الامير خالد وبلغه بالذي حصل ورد عليه خالد وقال هذا الكلام كلام شفوي ولا فيه شي بين يديك فقال الامير عبدالله نعم فيه شي بين يديه القصيده الذي من العنزي موجهه لك ويوجد رد باسمك مصور على ضهر قصيدت العنزي ومكتوب باسم الامير خالد الفيصل على العنزي وكلمت على تعتبر كطرد فرد المير خالد بعد هذا الكلام فقال انا ماجتني قصيدت العنزي ولا رديت عليه وبعد هذا الكلام الذي حصل بين الامير عبدالله والامير خالد طلب الامير خالد من الامير عبدالله بانه يرسل القصائد المذكوره اعلاه عن طريق الفاكس وتم ارسالها على حسب كلام عوده ابن زله يرحمه الله فرجع عوده الى منزله واخذ اساس القصائد المذكوره وقام وانشاء قصيده تعتبر رد على البيت الذي يقول فيه يم الخابور ونواحيه وتعتبر قصيدت عوده عن حل اعنزه وترحالها

ويقول الشاعر : عـــوده ابـــن زلـــه يرحمه الله



البعد والخابور ماهو لنا جد ** والجد وايل والمساكن كسبناه

من دار ابن هذال لشبيح ياصد ** ياما وطينا فلحها مع قراياه

والقوم والعدوان نحدها حد ** ياما طوعنا بدوها مع شواياه

والسمير والشعلان صارو بها ضد ** تمدنو بالشام لياوادي المياه

وتبدلت صاروخ والباب من سد ** ونتم ذرانا ياذرا كل من جاه

وليعذرب الرحال بعده اليا شد ** يرعا قفر غيره ويرجع على ماه

وحنا نقول القول والصدق ينعد ** مثل القمر للشعب تنور ظواياه

نفالة الحكام بالطيب والمد ** عدن نهار الظيق تشرب ضماياه

عقب الامام مخضب السيف ياهد ** عبدالعزيز وتفعل الفعل يمناه

صقر بها العقبان وحلل بها اعقد ** وخلا سرحان الذيب يمشي مع الشاه

جنت نعيمن مدهله لياتمهد ** وجاب الصيارم وكتفا بكل ماجاه

ونتم غلاكم كما شامت الخد ** ولو درت بالويلان ياغير تلقاه

ولاقلتها قمار ولا تحمد ** وحيات منشي الغيم معطي عطاياه


.................................................. .................................................. ....

وفي هذه الايام قام الـــشــاعــــر : صـــالــــح ابــن عـــوج الـــــزواي الـعـنــزي

وشارك في قصيده معبره وهي تعتبر كطلب من الامير خالد الفيصل ال سعود الى البعض من قبائل اعنزه والذي لم يحالفهم الحظ في التجنس انذاك وكان في هدف الشاعر : صالح عوج والذي كان في وده من الامير خالد الفيصل بما انه اعترف بعضمت لسانه بانه من قبيلة اعنزه فالذي كان في خاطر صالح بان الامير يكون كواسطه عند الملك فهد يرحمه الله لتجنس هذه الفيئات من قبيلة اعنزه وتبدء مشاركة الشاعر : صالح علماً بان القصيده لها مقدمة كلام ويقول في المقدمه الى سيدي صاحب السمو الملكي الامير خالد

الفيصل السلام عليكم ورحمت الله وبركاته ....... وبعد

هذه القصيده الى سموكم الكريم وهي بمناسبة اعتزازكم في قبيلة اعنزه وارجو من الله العزيز الكريم بانها تنال اعجابكم ودمتم لنا ذخرن وفخرن لا يزول ..... واليكم القصيده والتي اقول فيها



مبداي بسم الله بول وتالي ** وربن له المخلوق دايم اسجودي

يرحم عبيده في جميع الاحوالي ** مرسي سفينة نوح بجبال جودي

انت الرجا في مطلبي وبتهالي ** ونت الذي بالكون تحمي الوجودي

وياعز والله من رجا فيك نالي ** ولافيه غيرك راحمن يمعبودي

ومن بعد ذكر الله اهدي مقالي ** لميرنا المعروف بعذب النقودي

يامير والله مانبيلك زوالي ** وعساك دايم بالمعزه اسعودي

ياخالد الفيصل فتحت المجالي ** وهذا الوكاد الي عليه الجدودي

انت الفهيم ولا باصلك خمالي ** ومن لارضا يامسندي مايكودي

حيثك اصيل وماكرك بالمعالي ** ومن كان مثلك يافتا مايحودي

ونت الذي وضحت حكي العدالي ** ولنا الفخر يامير مثلك سعودي

يامير ياكاسب رفيع المدالي ** وأسمح لنا ياشوق ظافي الجعودي

نبي انتكلم يوم فيها مجالي ** ونفخر بكم ماقلتها للوجودي

لشك اغار وغيرتي في هوالي ** من يم ربعي كيف ماني صدودي

وننصا جنابك ياكريم المعالي ** وحزاتهم بالكون ليه اعضودي

ماني هبيلن داله القلب سالي ** وليمتلا بطنه غدى بالرقودي

ابن المشدق من قديم وتوالي ** ومن لعتزا يامسندي مايفودي

اصلي من الطيار يومه بدالي ** ويلان من ويلان بليا شهودي

والله يعلم ماطرا في خيالي ** ومن يمك الويلان اتفادي اجنودي

اقول كلمت حق ماني مسالي ** وعاداتنا بالهرج نمشي سنودي

واصلي من اصلك بالوفا والمنالي ** يالوايلي ياعزوتي لك نعودي

لو اعنزه بطراف حد الشمالي ** ماتعتزي ياكود يم السعودي

هذا الوكاد الي على القلب صالي ** ماهي سوالف مسردن او حسودي

ونقولها بلسان يهوى المعالي ** مهما حدتنا بيضها والاسودي

وعاداتنا لحفظ الكرامه ننالي ** والي يريب النفس ماله وجودي

ولاننخظع ياكود لرب العوالي ** سلايلن ماقيل فينا شرودي

ونئبا المذله في كثير المجالي ** ونفوسنا للعز دايم ترودي

حيث اعنزه تريد حل المسالي ** ونتم لها من دون كل البنودي

مهما يكون البعد لاصلك تنالي ** ونتم سندها في سموم وبرودي

يبون منك الحل ياعز وتالي ** واصل البطاقه ماتنوله اجدودي

ياتون عندك من يمين وشمالي ** ورواحهم تفداك وسط اللحودي

ياعاد مانعتز امثلك ارجالي ** ونت الفخر يامير يبن السعودي

وأفزع لنا يامير عند الغوالي ** من أجل اعنزه تقول لفهد الفهودي

وعسى الولي يعطيه عمر ومهالي ** ويبقى فخرنا في جميع الوجودي

نبي الحفيظه يارفيع المعالي ** وخمست عشر عامن علينا تزودي

بليا توابع ظاق فيها المحالي ** وحالاتهم يامير صارت ازهودي

عند الحفر في دقها والجلالي ** ويرجون عطف الي مثلكم بالوجودي

والله ماتبغون شرح ومقالي ** وفيكم كفايه ياعريب الجدودي

ياما حليتم من مشاكل اعضالي ** وحيث امركم لعنوزكم به نزودي

والله ياصل من وصل لامحالي ** ورحم رحمك الله بعطف وصمودي

وصلاة ربي عد وبل الخيالي ** وعداد ماهل المطر من ارعودي

على الرسول المصطفى ياهنالي ** وشفيعنا في يوم نشف الكبودي



والسلاااام على من اتبع الهدى

يتبع رد الامير خالد الفيصل

[صالح بن عوج الزواي]

وبعد إرسال هذه القصيده لصاحب السمو الملكي الأمير خالد الفيصل

بخمسة أيام أتى خطاب رد من صاحب السمو ويقول فيه إلى السيد المكرم

صالح بن عوج الزواي العنزي

السلام عليكم ورحمة الله وبركاته ... وبعد ...

تلقيت رسالتكم المتظمنة قصيدة مهداه لي منكم ولذا أشكر مشاعركم المخلصة

اللتي فاضت بها تلك القصيدة وما أشرتم إليه سوف نفعل مانستطيع بشأنه

إن شاء الله ولكم تحياتي

صاحب السمو الملكي الأمير خالد الفيصل


وبعد هذا الرد بما يقارب ست سنوات بدا لي بأنني أكتبله رد على موجب خطابه هذا

زايد دفعه للموضوع الأول لأن الموضوع من أساسه طلب تجنس لبعض الفئات من قبيلة عنزة

الذين لم يحالفهم الحظ في التجنس فكتبت له هذه القصيده اللتي أقول فيها

فرحت في رد الجواب وقريته +++ وإنسر بالي يوم للهرج رداد

ورديت لي ماكان عندي هقيته +++ ولاخاب ضن اللي لك اليوم رواد

تبعث أمل في خاطري مانسيته +++ وعلى حسب ماتقول ردك لنشاد

وأنت الذي يامير لهمي شفيته +++ وعسى الذي من كان مثلك لنا سناد

والا الردي ياعزوتي مانصيته +++ أعرف أنا المقناص في كف صياد

وبجاه الكريم اليوم يومي رجيته +++ ييسرلك المطلوب لياجيت نشاد

وأنتم سند من كان قاعد ببيته +++ ويرجى الفرش ياشوق مزبور الأنهاد

وياصاحبين الجود يومي رأيته +++ أفعالكم ماتنحصي بكل عداد

مدوا من الي مدكم عند بيته +++ رب(ن) كريم وللكريمين مداد

الواحد الي مرتفع فوق صيته +++ واللي له الأعباد ركع وسجاد

تخضعله الأرقاب حيه وميته +++ رافع سماها عن وطاها بلا أعماد

جل جلاله معتني في مشيته +++ وأستغفر الله كان للهرج نقاد

ولولا اللذي في خاطري مابنيته +++ وعندك خبرهم يابعد كل من غاد

من حال ربع(ن) صار فيها حتيته +++ والله يعلم ماخفى يبن الأجواد

والله لو إن الربع بقصى كويته +++ من يمكم صافين وأحلى من الزاد

ويلان تعرف في نهار المبيته +++ وتاريخهم يشهد لهم وقت الأطراد

ولاشك هذا اليوم صارت مشيته +++ والحمد لله في قضى رب العباد

رب(ن) لطف بوجودكم وأعتزيته +++ ياعزوتي الي دون كل الملا وكاد

ورب(ن) رحمنا بخير قبل المميته +++ ويارحمة المعبود تمنح للأجواد

والحمد لله في صباح ومسيته +++ واللي نقد ربعي من ديار الإلحاد

بديار أخو نوره عساها بخيته +++ وفي زايد الخيرات يارب تزداد

وانتم سنام المجد وانتم لبيته +++ وأنتم فخرنا بكل مايقال ويشاد

ولاقلتها في شان مرفوع صيته +++ والله يعلم مانكنه بالفواد

ونعتز فيكم من نسبنا قريته +++ ولنا الفخر فيكم ترى دون عباد

تم الكلام وحاجتي ماقضيته +++ والله ييسرها على خير ميعاد

وصلاة ربي عد من حج بيته +++ على نبي(ن) للمسلمين منقاد



وبعد هذه الأبيات كنت في مدينة الخفجي وكان عندي أبناء وبحثت لهم عن وظايف

ولكن بدون جدوى وصار في خاطري بأنني أكتب إلى الأمير خالد الفيصل هذه الأبيات

والأبيات تنم عن صلة القربى والإنتماء وقلت فيها

ماقنصنا غير فيك +++ عزوتي مابك رداه

تفزع لمن هو يجيك +++ ليا تمايل مستواه

وحالته صارت ركيك +++ ولحد لباله نواه

بين المراجع هذيك +++ وياوقته هذا جفاه

وأفتخر وأعتزي فيك +++ لو ماتدري بالخفاه

وأحمد اللي لي عطيك +++ وهذا من زايد رحماه

ولو أنتمنى عليك +++ ماحصلنا بالمناه

والله أننا نغليك +++ ولاهو نفاق أبراه

ومن عزة نفسي مابيك +++ ولكن وقعنا بهواه

ولاهو تكبر عليك +++ لا واللذي مانراه

وأن سمحتولي نجيك +++ وأنتشرف باللقاه

وهذا مشروهي عليك +++ وأفتخر فيكم سواه

وأصلي من جدك وأبيك +++ ولكن تفرقنا الحياه

دام عزك في مجيك +++ ومن فضل رب(ن) عطاه

والله لايغير عليك +++ في كل موقف وإتجاه

إن صدقتني بناخيك +++ وإن كذبتني مزراه

نفسي عزيزه ماجيك +++ ولانوطيها بالوطاه

ماتخضع غير لباريك +++ ويامحلاها من صفاه

والله لو ماعتزي فيك +++ ماتوجهلك وجاه

وطبعي عنصري عليك +++ وظلوعي فيها حناه

داخلها قلبي يبيك +++ وغلاكم مابه مراه

وهبه من ربي يعطيك +++ ويافضله محد حصاه

واخر كلامي نهديك +++ ياصيل في مزاياه


وإضافة للكلام الأول التي موجهه الى صاحب السمو الملكي هذه القصده الرابعه

واقول فيها

لي الفخر في طلعتك يارجل بان +++ ومعقب(ن) لك من صقور البلادي

وأنا أشهد أنك شيخ من نسل شيخان +++ وأنا أشهد انك من طيور الهدادي

أصيل في كل المزايا كحيلان +++ ومعرب الجدين ولنته بغادي

من عيال وايل ياسلايل نبيهان +++ وخطلان الايدي في حظرها والبوادي

والحمد لله عز من شانهم شان +++ متوارثين الزين بكل المبادي

ومن يفعل الإحسان يجزى بالاحسان +++ ومن حصل الشينات بفعله رمادي

الساس زين ولابدى فيه خذلان +++ ونسل الحرار أحرار وهذا وكادي

وقلبي على من مثلكم صار ولهان +++ وأعتز فيكم يامضنة فوادي

وأصلي ترى من أصلكم فيه جدان +++ علي ومنبه من عيال وهبن وكادي

وأعتز وأفخر في سلايل كحيلان +++ وأمجادهم بالناس صارت تنادي

هم عزوتي ومن لارضى راح زعلان +++ وعساه مايرضى على غير قادي

نفسي عزيزه ماتدنت على شان +++ وياعزها الي عز كل البلادي

أنتم هوى بالي وأنتم لنا اركان +++ وأنتم سندنا عن خطات المعادي

وأعتز فيكم كيف من قلب ولسان +++ وياعزوتي الي بين حظر وبوادي

تعبير صادق من تصاميم ويلان +++ نقول مابالنفس ولالك نحادي

وحنى الذي بقلوبنا للعرب بان +++ نقولها بوضح النقى ولانخادي

هذي عوايدنا من دور الأزمان +++ وصايل(ن) ماننخضع للمعادي

هذا كلام الصدق في كل مابان +++ وأقولها ماخاف وربي سنادي

وصلاة ربي عد مابالسمى بان +++ واعداد ماهب الهوى بالمنادي

على الرسول المصطفى سيد عدنان +++ تفخ به الاسلام وياخير هادي

[سعد مسهوج]

الله يعطيك العافية اخوي صالح على نقل هذا الحدث المهم والتفاعل معه


وبالنسبة للرد بالنيابة او انتحال شخصية الامير الشاعر خالد الفيصل

فهي واضحه مااهي من اسلوبه ابدا والشعار عارفين هالشي

بالنسبة لكلامه اننا رحنا وخلينا نجد

هذا من سطارتنا وسطوتنا
والدليل كل ارض زينة تلقى عنزة مهيمنين عليها وهذا دليل القوة

ومن عهد الاخطل كانوا يتلامزون شعراء نجد على اننا طردناكم من نجد

وكان رد الاخطل اننا اخذنا الشمال وما به من خيرات وضعفكم هو اللي ترككم ما تعدون رمضا نجد

راحو عنزة ورجعوا وما زالوا مهيمنين والدليل الحكم بالسعودية والكويت والبحرين

وحتى شيوخ عنزة اللي بقوا بالشمال لحالهم دول ولهم مكانتهم




العربي الصميم منذ ان خلق وهو يتبع الحيا المطر والعشب
واذا تبي تقيس قوة القبايل شوف وين اراضيهم ؟؟

واللي تتمتع ارضه بالخصوبة وبالخير والعشب هو الاقوى لا محاله



والشمال ما يعييب عنزة

بنجد لنا مجد
وبالشمال لنا رجال





حبي واحترامي لغيرتك وحمياك يالوايلي



اخوك

سعد مسهوج

[سليمان الخرس]

رحله بين أحرف تكتب بمداد الذهب
كلمات رائعه تعكس بياض قلوب افراد هذة القبيله
حتى عندما اتى الخطأ من شخص غير مسؤل وهو للأسف عنزي
لم يكن الرد سوى توضيح ودون استنقاص

الشاعر الكريم

الف مليون شكر على هذة القصيده الرائعه والردود عليها

وليس بغريب من شاعر بمثل قامتك

[صالح بن عوج الزواي]

اخوي سعد الله اشكر تعليقك على هذا الموضوع الوافي

ولا يستغرب منكم مثل هذا وهذا يعتبر واجب على عموم ابناء هذه القبيله

الذين ينقلون من أحداثها وموارثها مايفخرون به

ولك مني جزيل الشكر والاحترام

[متعب عبدالهادي الفققي]

صح لسانك اخي ابو فالح صالح الزواي
ولك اطيب تحيه والف شكر لك ولحميتك اخي ابو فالح

وانا كنت محتفظ بقصايدك لتنزيلها با الوقت المناسب

ولكن الان كفيت ووفيت ومبروك عليك الشهر الفضيل

[طلال الدوامي]

نجد جفتنا وكل دار لنا دار

ماهي معافه مير جوع ومداهير



صح لسانك يابو فالح وبيض الله وجهك

[ابو شامه]

صح لسانك ولسان الشعراء بهذا الامسيه ويعطيك العافيه

[محمد بن فرحان]

وافي يابو فالح وعلومك غانمه


وللمواقف رجال

وانت شرفتنا بالماقف الغصاب






لاهنت وبيض الله وجهك

[محمد بن دوهان]

صـح لسانـك وبنانك وإعتلـى شـآنك يـا أبـو فـالـح .. ولسان كل الشعراء الكرام الذين ورد ذكرهم وعلى طليعتهم صاحب السمو الملكي الأمير خالد الفيصل دايم السيف.

وليست بمستغربه عليك ولا منك هـذه المواقف الرجولية ، فأنت من أهلها كابر عن كابر.

ونسأل الله أن يوفق حكومة خادم الحرمين لكل ما فيه خير وصلاح هذا الشعب الكريم وأن يحفظ لنا ملكنا الكريم الملك عبدالله بن عبدالعزيز وأن يقر عيناه بصلاح أمته وشعبه ، وهذا هو ديدن هذه الأسرة الكريمة، منذ قيام السعودية الأولى وإلى أن أرسل الله لنا المؤسس رحمة الله عليه الذي قام بإعادة توحيد هذه البلاد على كلمة لا إله إلا الله وسنة نبيه عليه أفضل الصلاة والسلام.


بكل شغف ننتظر نزف عبير القاف ، من جنابك الكريم.