طلال تركي

[سليمان الخرس]

قصيدة الشيب للشاعر الشريف مهداة للاخ العزيز طلال تركي الدوامي
تضامنا مع العم ابو عبدالعزيز:)
ضد الهجمات المتلاحقه :)

http://www.youtube.com/watch?v=z29H9Km8nJ8

[محمد بن دوهان]

الشكوى لله .. رب البيت

http://www.youtube.com/watch?v=q-9WvfJ1hXQ&feature=related



الشيب شفته في المرايــا وصـــــــديت
ماكنت اصـــدق ان ذا الشـــــــــيب فيه

اثر الزمن يطوي رحالــــــه ووليــــــت
وراحت سنين العمر وش هـالبقيـــــه

من بعد شفت الشيب في الرأس حنيت
حنيت لســـــنين (ن) توالـــت عليــــه

سنين ذقنا المــر فيهـــــا تجنيـــــــــت
وياكم تكبدنــا صنــــــوف البليــــــــــه

ذقت الحلا في بعض منها وتهنيـــــــت
مرة عليّ مر الصبـــــح والعشــــــــيه

وســـنين يا كم تهت فيها وتماديــــــت
مابين ســــب وظلـــــم والا قفيــــــــه

وياكم تحملت المعاصـــي وجريـــــــت
جريتها وامثيـــــل جــــر المطيــــــــه

وسعيت في الدنيا وكم صبت واخطيت
واللي مضى عـ الناس يمضى عليـــه

ودارت بي الدنيـــا ولا يـــوم ونيـــــت
وقضّيتها مابين شمــــس(ن) وفيــــّه

يامرحبا يالشـــيب من يوم حليــــت
تظهر على نفســـي امور غبيـــــــه

يالشيب ماخوفت قلبي ولا احزيـت
الا مواريد(ن) بتقبــــــل جليــــــــه

انت النذير اللي على الباب طليـت
واوصلت حد الباب وش عاد ليـــه

ماعاد لي الا التوبه إن كان يزكيـت
وسألت انا المولى ورب البريــــــه

وقلت توبي يانفس قبل ياليـــــــت
ماعاد ينفع ليت وقت المنيـــــــــه

صومي وصلي ثم حجي الى البيت
وروحي الى طيبه ومسجد نبيـــــه

وتزودي بالخير من بعد مااشـــــقيت
نفس(ن) تعاندني ونفس(ن) عطيه

وان معشت يانفسي من الخير جمية
جنيت لي مجنى الثمار الهنيــــــــــه

يارب تغفر زلتي يـــــــــوم زليـــــــت
وانك تجنبنـــــي الزلل والخطيــــــــه

وعلى الرسول ازكا ســلام وصليـــت
اعداد ما هلــت مـــزون النجيـــــــــه


رحماااااااااااااااان وانا ولد ابويه
ياااا عونة الله عليكم كلكم

[عوض العطيش]

أبو عبدالعزيز :

و الله جعلتني أشك بأن أحد والديك ... إمرأة !

يا خوي وش فيك ما أنت مداني طريا الكبر ... تبي تثبت لنا أنك صغيّر ؟! بسيطة ... صفّر العداد و أبدأ من جديد ... يعني أكرش الحريّم اللي عندك و أعرس من جديد !! سهله ما يبيلها طرحوهم

[طلال الدوامي]

هههههههههههههههههه



الشيبان واحد يسند للثاني بس مابيطون لازم يقلبون على بعض




الشايب شايب

[محمد بن دوهان]

لشورك والله ما نطيع=ولا من برآيك قدا
وللأصيله ما نبيع=وساسها ما به ردى
لعيونها ام الرضيع= اتزغرت وحنا نحدا
يا منّا جينا جميع=ابطينات ومعها عبدا


أرر سبيعي ..

إنطح إنطح .. ترني جيتك بابن عطيش

:):):)

[طلال الدوامي]

هههههههههههه

صح لسانك يابو عبدالعزيز



مثل ماكنت متوقع الشيبان تهاوشوا

ههههههههه


ارر سبيعي

[عوض العطيش]

هديتك للرأي السنيع **** لكن الشيبان ... عندا

أدري بك عوداً ما طيع **** بلشه العود ... لياغدا


(أحمد الله جاء وقت السحور ... ولا مغطتك بمئة وستين بيت ... يا ابو عزوز ... وخليتك تمرح عزب )

[محمد بن دوهان]

سحور البركة والعافية إن شاء الله يا أبو خالد ..
وصح لسانك إستلم وانا بناخيك .. جيتك ..


يا ربنا وانت السميع=تهدي بكتابك من غدا
وبجاه محمد الشفيع=ناتي للجنة رفدا
جوني الضويعن والمنيع=ولنطحهم مالي جدى
مار يا عوض كانك تطيع=اترك سلوم المقردا
رآيي لك هو السنيع=وقولي لك هو الهدى
يا من ذكر لك الربيع=وقران حادي ما بدا ؟؟!!
حاذور بالك له تطيع=يقلع ضمدك ويشردا


إسمع كلامي وخلك معي أزين لك لا يقلع ضمدك طلال باشا وعقب يتفرج عليك ..

اقعد إقعد يا نايم لا يشربكها على راسك بناخيك ويهرب ..

[طلال الدوامي]

<<<<<<<<<<<<<<< هذا الشخص فااااااااااالهااااااا


الشيبان قامت الحرب بينهم







ياربي ميت من الضحك


ابو عبدالعزيز

ابو خالد



هوشكم فله قصايد ومصطلحات دورتها بمعاجم الفرس والروم ولا لقيتها


ههههههههههههههههههه

[محمد بن دوهان]

:):):)
إضحك وإستانس يا غليّم ياللي إسمك طلال
هلحين يجيك ابو خالد متسحر ومتزهب لك

وبعد كلامي له راح يعرف انك انت ساس المشكلة وكلها منك

<===خايف لا يقلب عليّ

ههههههههههههههههههه

[طلال الدوامي]

يابو عزيز لاتضيع=انا وعوض عضدا
انا ضويعن وهو منيع=وربي يجنبنا حسدا
لهرجك لا لا مايطيع=معدنه لا ما يصدا

[محمد بن دوهان]

جاء لك جوابي سريع = بإذانك له رعدا
انت يبغي لك تسنيع=والا هو ما به ردا
اتجضع له تجضيع=وترسل برقيه وندا
وتلوبد لنا جميع=وتضحك ولك قهدا


جنب عن الدرب وحنا نسلم من شرك انا وأبو خالد عويذ الله من شرك

وأبو خالد يفهمها ويلقطها وهي طايره
وكشفنا اوراقك يا أخ يا مستر طلال

:):):)

[محمد بن دوهان]

:):):)

أضحك الله سنك يا بنآخي يا أبو تركي ..

لك كل التحايا والمحبة ..

وكن بخير من الله عز وجل وبحفظه ورعايته ..

[عوض العطيش]

أنا ... موافق ... للتطبيع *** جهودك ... ما ضاعت ... سدا

نبي .. نسوي.. مقـاليع *** ونروح ... لطــــلال ... نحدا

نلز ... شيخ ... المفاريع *** ليامـا ... نعـــدّيه ... الهدا

و ناخذ النياق المضاريع *** والحيل ... نسويهن ... غـدا


أدري تبون تضحكون على ( النياق المضاريع ) لكن ماعليه ... بدو وش عرفكم بالأبل والمصطلحات العصرية !

نياق مضاريع : تأتي بمعنى نعاج لقحات : أي دفيع بمعنى حوامل ... والمقصود بهذه التسمية الكائن الحي غير المذكر الذي يحمل بداخله كائناً من نفس النوع لكنه أصغر حجما وهو ما يطلق عليه اصطلاحاً اسم البيبي! أظنها واضحة ؟؟!!

[محمد بن دوهان]

:):):)

الله يضحك سنك يا أبو خالد

وبعد ما اتضحت لك الأمور ومقاصد طلال فإنا نحمد الله على ذلك وعلى قبولك للتطبيع فخذ الحيطة والحذر منه ..

وبهذه المناسبة سوف نقيم إن شاء الله رجم بشنق الشبكة ونسميه رِجم طلال تخليداً لهذه الواقعة

وإليك كروكي الرِّجم :

http://thumbs.bc.jncdn.com/b2a2ee12a2b1641726b90b5be4553a04_lm.jpg

وأيضاً نطلب من طلال تقديم الولاء والطاعة للشيبان وعدم تعرضهم ومناداتهم بأي لفظ أو قول يذكرهم بأنهم شيبان مثل قولة يا عمي أو يالشايب أو الشيبان .. وسوف يكون الشرط الجزائي الذي طلبه أبو خالد واجب التنفيذ بعد عيد الفطر مباشرة ً إن شاء الله وحتى إن لم أحضر فإن أبو خالد وأبو زيدان وبقية الربع يمونون ويسدون عن حضوري ..

أبو خالد نبي طلال يسوي لكم مثل هاللي بهالصورة :

http://3.bp.blogspot.com/_q60Xho-Jui0/RX0otvPRj3I/AAAAAAAAAAc/9E-K1g4druQ/s320/%D9%85%D8%AC%D8%A8%D9%88%D8%B3+%D8%A8%D8%B9%D8%A7% D8%B1%D9%8A%D9%86.bmp


وذلك إحقاقاً للحق وإرضاءً لكم يا شيباننا :):)

[عوض العطيش]

الرجم هذا رجم طلال *** تخليد لراع ... المفاريدي

نحط براسه نجر ودلال *** وصوره لشيخ المقاريدي

الشيب لنا قدر وإجلال *** بدّل (عمّي) خلّها سيدي

انا و ابن دوهان عيال *** واحدنا تقل شايباً زيدي

[طلال الدوامي]

شيبان شيبان وش ماسويتوا


وانا لكم يالأثنين


لي عوده عشان اثبت انكم شيبان