وين ابن جوال غايب

[محمد الطرقي]

وين ابن جوال غايب فاقدينه له ليالي = ياجعل بالوضع خير وياجعل بالآمر خيره

ليه ياماجد تغيب وعن رفيقك ماتسالي = لا سوال ولتصال ولا في قناة الجزيرة

[خليف الدوامي ابو زيدان]

هلا ابو يوسف

إن شاء الله خير ويسمع نداك ويجيب وصح لسانك0

[محمد الطرقي]

صح الله بدنك يابو زيدان وخلك قريب الياجاء تكون بصفي


ننتظر عودته

[عرفاء قماصي]

صح لسانك يابو يوسف وبانتظار ابن جوال

[محمد الطرقي]

صح الله بدنك يالغالي وابن جوال مختفي عسى المانع خير

[ماجد بن جوال]

السلام عليكم و رحمة الله و بركاته

الإخوة الافاضل

محمد الطرقي..ابو زيدان..عرفا قماصي

أعتذر لكم على التأخير و يعلم الله ما إطلعت على هذا الموضوع الا من يومين

و أعترف بأن ابو يوسف اتصل علي من طيبه اكثر من مره
و من الردا ما رديت عليه الاتصال

لكن يعلم الله ماهو صده يا ابو يوسف

لكن الدنيا و مشاغلها

و خابر ان الاعذار عندك مقبوله

و من أمن العقوبة...أساء الأدب...و أنا يا بناخيك .. أمنت عقوبتك .. فلا تؤاخذني على سوء الأدب

و أرجوا أن تعذرني الأبيات التالية...و ارجوا ان تعذرني عن لمحاورة لأني و الله الآن بإجازة و دخولي للنت قليل جدا

فالعذر من الله ثم منكم




انت وافي يا محمد..دوم تسبق بالسؤالي=دوم لا غبنا تنشٍّد..دوم يا مغلي عشيره
لو يصير العذر ثوب وضافي ردونه طوالي=ما تستٍّرني ردونه لو هو ردونٍ ستيرة
مير عذري منك اني خابر و لاني مبالي=ان اعذارٍ صغيرة عندكم تدمح كبيرة
افتخر بك يالبناخي لا طرا ذكر الرجالي=دوم اسمك مقترن بالمرجله في كل ديرة
انت من ربعٍ لهم بالقلب منزل حيل عالي=قربه بدم و نسابه به تواريخٍ و سيرة
الرماحي و المسيكي ذاك عم و ذاك خالي=روح وحده وزعه ربي بأجسادٍ كثيرة
لو جميع الطيب سيل و له شعيب منه سالي=يدٍّرج سيله يسيل ومن يحير انتم محيرة
لا تحسب اني اصد او انكم منتم ببالي=لا حشا لا ذي و لا ذي لكن الدنيا عسيرة
و ذا ترى الانسان دايم كل يوم و هو بحالي=يوم أصاب و يوم أخطا و يوم واقف فيه حيرة
و الخطا وارد و لكن اعرف انك حيل غالي=و كان أنا أخطيت المسيرة فأنت اقديت المسيرة
ما اجتمع طيب و محبه غير بقروم العيالي=وانت لك يمنىً بهن كسابةٍ ماهي قصيرة



ما انسى اوصل تحياتي لكل من:

ابن العم محمد الدوهان...و ابن العم المعاند.....و الشيخ الفاضل..و الاخ الأكبر...متعب بن عبدالهادي الفققي

تقبلوا تحياتي


و أعلم يا ابو يوسف أن الأبيات اقل بكثير من قدرك في صدورنا

[عرفاء قماصي]

صح لسانك يابن جوال وبعيدا عنك الردي يالبناخي وصح لسان يابويوسف وتقبل مروري

[محمد الطرقي]

العذر مقبول ياماجد وللله الكمالي = عذركم مقبول يابن العم مادورت غيرة
المعزه حطتك ياصاحبي في وسط بالي=وأن نشدنا مانشدنا غير عن ناسٍ قديرة
ولايضيق من الصحيب اللي مثل صدر الشمالي =واعرف انه مايضيق الصدر والدعوى صغيرة
وأنت عن درب الخطاء مرفوع في رؤس العوالي= واخذ منا العلم ياماجد وانا مرسل بشيرة
صاحبك في مدرست علم النفوس من اليالي = اعرف الرجال من منطوق شعرة وتعبيرة
ما درست العلم والتعليم ماجالي مجالي=بس اعرف الناس يابن العم وعيوني بصيرة
واعرف انك ماتجي يم الرداء في كل حالي = أنت من رؤس الرجال اللي لها علم وشهيرة
الخطا ء مسموح لونك تجاهل لتصالي = النفوس احيان ماتقبل تجاوب مستذيرة
دام نعرف مقصدك ماهو غرور ولا تعالي= اعرف أن العلم والموضوع في جعبة خبيرة
الهدف معروف واخذ الرد في جملة مقالي=جتك منا الوارده والردمن شان الصديرة

جالك المنضوم والمنقوص ماهو من حلالي= الضروف احيان ماتمشي على حسب الوتيرة

الاخ الغالي ماجد الجوال صح الله السانك يالغالي
وانت بعيد كل البعد عن الردا والا انت من أهله
بارك الله فيك ومرحبا بك ومليون هلا بعودتك الطيبه
والمعذرة عن القصور امل ان الابيات تحوز على رضاكم
وتقبلو احترامي وتقديري

[سليمان الخرس]

هلابك يابو سلطان الوعذر مقبول لو ماتعتذر
ومابيننا عذر وملام وانا اخوك
الدنيا تشغل الواحد غصب

ياهلابك مدد بلا عدد

[محمد الطرقي]

الغالي عرفاء قماصي صح الله بدنك وكل الشكر على مرورك العطر

احترامي وتقديري

[متعب عبدالهادي الفققي]

حياكم الله وصح لسان اخي الغالي ماجد جوال بن وايل من اسرة علم يصبح جمع دلاق اعضب دونها صح لسانك على هذه الكلمات الموجهه الى ابو يوسف وصح لسان ابو يوسف الذي لم يتجاهل كلماتك ردا جميل وقبول جميل
حياكم الله وسدد على درب المحبه والاخاء خطاكم

[محمد الطرقي]

الغالي ابو عبدالله الله يبارك فيك وصح الله بدنك

وكل الشكر على مرورك الطيب وحضورك المنور

وتعليقك الرائع كلي فخر بك يابو عبدالله

احترامي وتقديري