العيد قرب ,,,,

[فواز الشويكي]

العيد قرب واريش العين زعلان *** نبى نرضى سيد كل البناتى

من الطفوله ,,, ( يعنى منذ مبطى)
وخصوصا كل ما قرب العيد ,,,
تطري لى هذه الابيات وارددها بعفويه ,,

احد يعرفها ؟؟ ومن الشاعر؟؟

[سليمان الخرس]

هلا عمي فواز
ذكرتني كل نهار العيد عايد حبيبه:)
والله مدري اذا مهي للهويدي سليمان مااعرفها

ليه مستعجلين كلها فشخه فشختين ويوثل قوقل السبعه
الدوهان

ماشاء الله عليه يعرف كل شين وسين:)

[ابو شامه]

ابن دوهان ابو احمد نبغي القصيده كامله لانها اعجبتني

[محمد بن دوهان]

هذه والله سمعت بها ولكني لا أعرف لها تكملة صراحةً ..

ولكن إذا ما خانتني الذاكرة بعد ما حاول أن يصيبني سليمان بالعين :):):)

فهي موجوده لدي في بعض تلك الكتب التي أمتلكها ولربما أنني قد إطلعت عليها سابقاً ..

سليمان إذكر الله تراني فقدت جزء من الذاكرة وكل السبايب منك أو إنك إستعنت بأحد الأصدقاء القدامى :):):)

لعل أبو عبدالله أو أحد الإخوة يعرفها فلننتظر ..

[سليمان الخرس]

ماعليك سو ابديت لمخك يرجع طبيعي

بعدين سبحان الله يحيي العظام وهي رميم؟؟
وينك غاطس؟؟؟

بن دوهان راح نرفع عليك كضيه
وهي عدم التواجد المستمر والمثمر في هذا الصرح

قدم عذرك بسرعه وخل ابو احمد يشرح عليه
ولا يتم الخصم عليك
والخصم من ابو شامه راح يقطع عليك جوالك:)

[فواز الشويكي]

ما الومك ابو عبدالعزيز ,,,,,,,
القصيده قديمة شوي وتبيلها مخ " 16gb "
لكن يا اخوك مسكت معى على هالقصيده ...
فى قهوة شيبان الصباح عند واحد من الجماعة , غدينى ازرق لهم من الدوام واكيد يعرفها حديهم !!!!!!!!!


ابو متعب :
الطيب يدمح له الزلات

[سليمان الخرس]

دمحنا له ياما قلنا بس
ماينفع فيه هو والميموري 16 قيقا
ههههههههههههههههههههههههههه

بسم الله عليه
تبون تعطونه عين يالسبعه

ابو عزوز بسم الله حولك وحواليك:)

[ابو شامه]

ابو عبدالعزيز دور بالكتب وجبها لنا قبل الاجازة

[فواز الشويكي]

فزعت المنتديات كلها ,,, وكود احد يجيب لنا خبر !!!!!! ماسكه بقوه !!!

[فرحان الهقشا]

الحمدلله يعني مو انا بس اللي غياب ههههه <<< حتى ابو عزوز

يالله ان سامحتوه ترى تسامحوني والا قرار العقوبه علينا كلنا << تذكرون العجوز اللي بالطياره اللي تقول قال كلهن يعني كلهن هههه

وبعدين خف يالمعاند على ابو عزوز خليه ينفعنا بعلمه الله ينفعه ( موسوعه السيعه ذات القوه السابعه ))

ماشاء الله لاحول الا بالله

[محمد بن دوهان]

حي المنازل ، منازل ذيك = أللي تقول آخذك خاكي
لعل زرق الهوى يرميك=وألا أصيدك باشباكي
همي وغمي وسقمي فيك=ما أطيع أنا لو حكى الحاكي
ما زل يومٍ وأنا بنآخيك=ألا وانا شاكيٍ باكي
يا مَيّ وقتي تقضى هيك =يا ذروة العنصر الزاكي
مديت حبل الرجا فيك=وهجوس قلبي بمأواكي
ما فيه قولٍ ولا تشكيك=وقلبك بما عندي أنباكي


خوذوا هاللعبونية غديها تسليكم عن اللي بعيد ٍ عنكم بهالعيد

:):):)

[سليمان الخرس]

ماتنفع هالكصيده يبن دوهان


صح الله لسانك يابو عزوز
بس ماقدمت ورقة العذر:)

[محمد بن دوهان]

يا قلب كم لي عن هوى البيض أنهاك=يا قلب مالي في هوى البيض راده
حب المها يا قلب فخ واشراك=ماله مِطير عند من كان صاده
ما تعتبر فيمن تبلاه شرواك=اضناه حتى عاف شربه وزاده
يبات بسهر العين يراعي للافلاك=واللي يوده ما اهتنى في ارقاده



وما أدري وين وداها ووشلون خلصت حياته هالشاعر ، بس إن حالي مثل حاله يا أبو متعب ..

هااااه يكفي هالعذر عند النشاما والا ما يكفي ..

[سليمان الخرس]

لقيت لك هالمعلقه اظنها تجوز لك يابو عزوز

ترا من طولها ماكملت نصها ونصها حذفته

في غيبتك قلبي ترى الهم صاليه
......................واسهرت ليلي بين ونه وويلاه

البارحه طيفك مع الليل احاكيه
......................يشهد علي الليل والنجم يصغاه

فكرت ويا الليل مبدع قوافيه.
.................. ...مسحوب طرقي والقوافي تقفاه

والحزن فوق القلب والهم مقفيه
...................و ليلي غدا ليلين والصبر مقواه

اكتب شطروالشطر الاخر نجاريه
........................شاعر تحد ه والليالي توطاه

اجزل بيوت الشعر وحكم معانيه
......................ولا هزيل القاف واضح ثناياه

ياللي حرقت القلب منهو يطفيه
.....................النار نار ٍ تتعب القلب واحشاه

يا مانسيت اللي من الناس نغليه
........................ولاعاد به شي ليا حل طرياه

استر عيوب الناس والطيب ابديه.
...................وش خانت اللي ماسترعيب رفقاه

امسٍ وقبل البارح القلب اهنيه.
......................امسي مع الفرحه وصبّح بفرحاه

في شوفتك افرح مع اللحن اغنيه
.........................وطيفك يسلي كل طرقٍ بمغناه

قلبي كثير اللي من الناس ترجيه
......................وانا الذي قلبك من الناس يرجاه

لاتحسب ان الصد صعبٍ تحديه
.......................ترى الزمن يشكي ومثلي تحداه

انشد وتلقى الليل تقصر مساريه
.................صدر الزمن يشكي من اقصاه ودناه

راحت هجوسك مبعده في هقاويه
.....................انشد جبال اطويق واللي ترقاه

تلقى زمانك قاصرات ٍ لياليه
.....................هذا الصحيح وتدمع العين فرقاه

وانت الذي لاضاق صدره نراضيه
...................نتعب على شانه على شان نرضاه

ولا انت تدري من زعل عيب اصافيه
.....................يادارس اطبوع المشاعر وتدراه

يا ما لقيتك تشكي الهم تشكيه
..................وجهك عبوسٍ تشكي الحظ برداه

ياللي خذيت القلب وشعادكم فيه
....................رده ترى قلب العنا وافي اشقاه

ارفق بقلب هالليالي تفاجيه
.........................يابو ثمانٍ مرهفاتٍ مصفاه

انا عشقت وعشقي محدٍ يظاهيه
................جيتك على الفطره وذ القلب يغشاه

احساس من قمة شعورٍ وطريه
...................عليك ياللي ناسي القلب تنساه

في كفي سيفٍ للعواذيل مرهيه
................وفي صدري درعٍ لسهوم المصلاه

ياقلبي الليله على وادي التيه
...................جريت ونه والف ونه من الأه

اسمع صدى صوت المعنا بتاليه
....................اضحك واقول الله يعين الذي تاه

والحق انا اللي تايهٍ في دواهيه
.......................مجراك نار تكوي القلب تكواه

باغيه قلبي والمشاعر تناديه
........................قلبي عشق قلبه مع الليل ناداه

يفداك منهو يجمع اريال وجنيه
.........................يفداه وجه الطيب والعز يفداه

مثل البواخر لا رست في مراسيه
...................حبك رسا صبح ومسا ابكل مرساه

بين الظلوع الحدب حبه ابنيه
....................واكتب عليه من الغلا شي يزهاه

لكنّ كيف القلب هذا امتناسيه
...................ياصرح مدري جرح ياجرح ودواه

يمكن صواديف الليالي تحاديه.
...........................ولاّ تغلا والغلا في مزاياه

لكنّ قلبي ماصبر ليل مشقيه.
.......................دنت هجوسي والبلا في محاتاه

همٍ على قلبي وهمٍ يباريه
...................... .ولا جروح القلب صعبه تبراه

البارحه قلبي من اللي يداويه
.......................ياكود وجهٍ يبري الجرح ملفاه

حامت شياطين الشعرمن بلاويه
...................وسرحت في عالم صعيبٍ بمسراه

هلّت دموع العين هلّت غواديه.
.....................على الذي قلبي من الناس بداه

اكتب حسين القاف وارجع ومحيه
.......................جف القلم حبره ولا نافعٍ ماه

شطرٍ نهليبه وشطرٍ نحييه
..................وشطرٍ على ماقيل ملعون مثواه

هذا حبيب ولا عليّه مشاريه
...................عشره قديمه والحكي توّ معناه

ترى الوفا والطيب حق ٍموّفيه
......................ترى الغلا والحب حق موّفاه

من باعني بعته وتقصر خطاويه
................مدعي عليه ادعي عسى الله يرعاه

لا ياندي العرض هذي تواصيه
.................ابوي انا اللي وافي الهرج بوصاه

وانا الذي من يشري القلب شاريه
.......................هذا محله قلبي واسعد بلقياه

اقلّطه في صدر قلبي وهلّيه
..................ارحب هلا واهلاٍ وننحر له الشاه

ونقدّم الفنجال والهيل حاليه
...................اشقر مقره من ورى الهند مجناه

يعني انتهى المشوار لاباس ياهيه
.................خمسين بيتٍ شاعر الجن سواه

وخمسين بيتٍ تقفي اللي مسويه
..............مسرج خيول الجن واهجيك بحكاه

من قدّم الطيبه نرفّع معاليه.
..................ومن قدّم السيّه مع الدرب دسناه

ادعيك من قلبي وانا الغير مدعيه
.................مشتاق انا والشوق وشلون ابنهاه

في داخلي حربٍ من الشوق مذيه
..................والصبر طعمه مر وكيف اتحلواه

من لايعرف الحر لاشك يشويه
.............اخطيت في حقي وانا ارجيك رجواه

انا الذي منهو رقا فوق اوطيه
........................عليك ياللي كل رجمٍ تعلاه

لا تحسب اني بسهر الليل مقضيه
...................جاتك مثايل وفهم القول وقراه

قبل امس احبه وفتخر في تلاقيه
.................واليوم هذا مثلي صرّح كرهناه

الخط الاحمر ليه نفسك تعديه
.....................قد قلت الك ومحذّرك لا تعداه

رادي ومثلي لاحشى ما ترديه.
..................درب الردى لارحم منهو تمشاه

كان الغدر ميزه وتفخر بتاليه
......................الله يعينك تالي الوقت عزاه

تصبح مابين الناس محدٍ يدانيه
.................قبلك صفق يمناه في كف يسراه

الرادي اللي يمشي محدٍ يراعيه
...................هذي حياتك باخر الوقت وتلاه

ياللي تقول الحب وافي ومرخيه.
.................حبل الوفا تقصره وشلون ترخاه

الحر لامن فز يكفخ جناحيه
..................انا عزيز النفس واللي ورثناه

المرجله والطيب لازم نقديه
....................ماني شحيحٍ تايه ارداه برداه

واليوم ياوجهٍ بدا فيه وشفيه
.....................الاّ عرفت القلب هذا ومرضاه

لا يالذي قلبك من الغدر تحشيه
....................هذا وانا مهجيه وذكر حلاياه

.لكن علي الله ماعاد انا ارجيه
....................في رجعته همٍ ولا عاد نبغاه

فيه البقا واللي حلاته نعزيه
......................اقولها من بعد هذا عرفناه

يرثيه وقت الحب والحال ترثيه
....................كم واحدٍ قبلك ترانا رثيناه

هذاك غالي والله اللي متوفيه
..............ولاانت لا مثله ولا وجيت شرواه

يشهد له التاريخ حضر وبواديه
.............يرحمك ياللي وافي الطيب والجاه

ونتي بديتي بالغدر من مواريه.
...............عمر الغدر شاين ولو زان مرباه

درب العنا ياللي نويتي مساعيه.
...................خايب وظنك ضايع ابكل مسعاه

فيك الغدروافي على كل اراضيه
.................ثوب الغدر ما والله يومٍ لبسناه

بأسم من انزل محمد وحاميه
....................الواحد القهار ربٍ عبدناه

ماني على صدك ترى القلب اعنيه.
................وشعاد يعني لو مثلك هجرناه

القلب يسلا مع هل الطيب اسليه
..............عندك خبر كلٍ على كيف مشهاه

اقفت ليال الحب واقفت لياليه
..............والشوق روّح لاترجى وتنصاه

اطغيت حتى القلب بالغدر معميه
..............الصبح لك قلبٍ مع الحب يهواه

والليل لك قلبٍ من الغدر ماليه
.............كنت الامل والنفس مثلك تحراه

ماني صغير السن مثلك يخطيه
..............اخطيت ياللي كل شيٍ تخطاه

اللي رقا للخير ربي يجازيه
..............جعله بخير وراعي الطيب حياه

واللي يحب الشر منهو يخاويه
...............ياكود مثل الطبع لاشك خاواه

العقل راس المال وشلون اقديه
.............في ذكر ربٍ عالي الناس تخشاه

جفت عروق القلب جفت خباريه
...............لاتحسب ان الحر مثلي تشواه

حرٍ وفي وصفه طوالٍ مواميه
...............انا عريب الجد ياضايع اجداه

اخطيت في قلبي على الكيف مهديه
.............انا اشهد اني ظالم القلب وسقاه

اسقاه من ظيم الليالي ومسقيه
..................همٍ وكل همٍ موفّي زواياه

الصدر لا من ضاق بالقاف اواسيه.
..............شاعر وومّر كل شطرٍ كتبناه

اكتب حروف الشعر من كيفي ووفيه
..............والشعر وهبه والعفو ماشريناه

وغيري كثير الناس لشعر تنخيه
............الناس واجد ياهل العرف تنخاه

لامن كتب بيتٍ تعزوا بعزاويه
...............مسكين ياللي كل شطرٍ تبناه

وانا احمد الله كل شطرٍ موازيه
...............لاطاح شطرٍ قام خيّه توازاه

العقل وافي واحمدلله مكسيه
............بالطيب والمعروف حنا كسيناه

حاضر بحاضر ياهل الحسد اسويه
..........والموت حقٍ يحصد العمر يفناه

متين شطرٍ وافي العرف محصيه
.........ساعه وثلث الطرق حنا بدعناه

وختم قصيدي عد ماهب ذاريه
.........على النبي اللي طريقه مشيناه

[محمد بن دوهان]

سليمان يا أبو متعب خذ هالبويتات اللي تذكرتهن ولكني فقدت الذاكرة ولم أعد أعلم من هو اللي قالهن وعطهن أبو أحمد خله بهن يسلي الروح :

البارح واليوم و الليله =علامك يالعين ماندتي
ركض ٍ قليلٍ محاصيله=غيرالتعب وش تفودتي
بيدتي الحيل و الحيله=لاعاد يومك ولاعدتي
ريح النفل ريح منديله=ووسادك اللي توسدتي

[فواز الشويكي]

يسعدلى صباحكم جميعا ,,, يوم صارت خوذو هالقصيده الرائعة للشاعر حمد المغلوث : بصراحة اطرب لها جدا ,,,, ( طلعت القلوب الخضر )

باح العزا من الحبيب الجنوبي **** ياعلي كن العقل بالكف مجذوب
ياعلي تذكار أريش العين دوبي **** زوله يزّول لي وانا عنه محجوب
ابكي على فرقاه والعي واهوبي **** والدمع من عيني على الخد مسكوب
من حر نار الولف مزعت ثوبي **** وطوّحت بالونه على كل نبنوب
وعقب الستر كل الخلايق دروا بي **** والسد ثار من الحشا ثورة الطوب
ياعلي لي نسنس نسيم الهبوبي **** نودٍ من الشرقي برى حالي النوب
سل ٍ يسل الحال من كثر لوبي **** لاهم لافرقا ولانيب مطبوب
الا انا بلاي فراق من سد نوبي **** عن كل معشوق من البيض رعبوب
ياعلي يافرز الوغا يا محبوبي **** ويش انت شايف ياحجا كل منكوب
عيا يطيب لي الكرى مع شروبي **** كن الحشا يصلى على حر لاهوب
ليت الركايب ياعلي ما مشوا بي **** من ديرة المحبوب والرزق مكتوب
وياليت ربي ماسعى في ركوبي **** ليت السنع معتاق والدرب مقضوب
واليوم ياغافر عظيم الذنوبي **** أسالك يالمطلوب ياخير مطلوب
تجمع بشملي مع حبيبٍ عجوبي **** محبوب ماغيره من الناس محبوب
اللي كما بدرٍ قرب للغيوبي **** او شمعدانٍ في دجى الليل مشبوب
اصفر عفر والكف منه مخضوبي **** ومجّمله ربي ولا فيه عذروب
الا الوفا ماهو مكورٍ كذوبي **** ومغفلٍ مايعطي العلم مقلوب
انا اشهد انه ثقل الحمل صوبي **** بالحب وادعاني شقي ٍ ومتعوب
هو ريف روحي ياعلي لو حكوا بي **** مصدود عن عذل العواذل ومحجوب
ما اطيع انا العذال لو فرقوا بي **** ولا أكف عن وصله ولا أسلى ولا اتوب
ما اسمع ولو حي عن حبيبي ولو بي **** صبر فلا حاربت زادٍ ومشروب
ما أطيق انا الفرقا رقاقٍ جنوبي **** وقلبي رهيف ودايم الدوم متعوب
يوم الليالي عن حبيبي رموا بي **** غديت مكتوف الجناحين ومصيوب
مثل الوحيد اللي غريبٍ اعزوبي **** مستاجع ماله حدٍ يقضي النوب
او شبه حيدٍ للمسير مغصوبي **** حمله ثقيل وضارب الخف شاذوب
والا كما طفلٍ يتيم يحوبي **** من قلة الوالي ورا الباب مذبوب
هذي سواتي عقب فرقا الجنوبي **** اللي هجرني مالفا منه مكتوب
هو يحسب ان البيض عقبه غدوا بي **** انا بصوبٍ وعن هوى البيض في صوب
وين أسلى اللي ذكرته يذوبي **** عقلي وهو متغطرسٍ يسحب الثوب
غروٍ من البيض العذارى محبوبي **** ترف الحشا ومعزلٍ تقل يعسوب
كن الردايف لي اقتفاها الهبوبي **** صيوان حكام بالاطناب مقضوب
وعيونه الخرسات سودٍ سطوا بي **** ونهود مثل التين والعنق مسلوب
ياعلي وين أسلى الهوى وين اتوبي **** وين اقدر التجليد والعقل منهوب
ياعلي خلوني حزين وألوبي **** لوب الحمام اللي على راس نبنوب
غير الوصل ماشي يطفي

[محمد بن دوهان]

إيه .. يا أبو أحمد منين جيتنا بهالعيد .. ذكرتنا باللي مضى من الليالي والأزمان ، خذ يا آخي عسى الله يآخذ عدوك ..


وان جاك اللي يسعلك عني=قل له توفى هالايامي

سمر الليالي تعشني =واللي بقي جلد وعظامي

الموت جاني ابلا تمني =سوّ اللحد واشعط الخامي

[سليمان الخرس]

طلعوا هالشيبان

:)