وش كبر عمرك يابن دوهان

[محمد الطرقي]

وش كبر عمرك يابن دوهان =ياعل سنك كبر سني
تراي مالاعب الشيبان= اخاف يجي الغلط مني

[سليمان الخرس]

صباحك خير يابو يوسف
المشكله أن السؤال الوحيد هذا اللي مو راضي محمد يجاوب عليه

وانت جبتها على الجرح^_*

[محمد الطرقي]

ههههههههههههههه
يابو متعب والله جت غصب عني الدعوى مبطنه
فيها انه كنت احاور مع علي القماصي وهو يطلب اسحيمي
وقلت له مافيه سحيمي هنا
دخل واحد من السحيم ويتعذر
يقول حنا نحترم الشيبان
واللي يتكلم مع اللي اكبر منه
معناة قليل ادب او قليل حياء في هذا المعنى
واخذت الدرس منهم
ابي اتأكد من عمر ابن دوهان
اخاف يكون اكبر مني وبعدين اتورط
وحبيت استفسر ماقصدي احرجه
يابو متعب

[فواز الشويكي]

متابع مواضيع العمر بقلق !!!!!!!!!
الله يعينك على الجواب يا صديقي ابو عبدالعزيز

[محمد الطرقي]

فواز الله يسعد صباحك
وتراني صارت عندي خرعه من الناس اللي ماشفتهم لازم
انشد عن عمارهم
قلي بيني وبينك ماعلم احد كم عمرك
الله يعطيك طولت العمر

[خالد عكاش العلاطي]

محمد الطرقي اسعد الله صباحك انت وأخواني في البيت الجميل ابن دوهان صغير في عمر الزهور وانا اعرفه زين قبل اسبو ع استخرج بطاقة احوال لكن بعقله يسو ى بلد

[سليمان الخرس]

ههههههههههههههههه

بن دوهان عمره صغير مانختلف عليها

وفواز بعد صغير

عمي الطرقي

صباحك خير
والله يعينك على الدوهان

[متعب عبدالهادي الفققي]

يا ابو يوسف وشلك با الاوليد هو وعمره .. هذا ورع امس
وهو يطرد السمون بشجر العضو با الهيل

اخبره وانا صغير اركض وراه ابيه يصيد لي السمونه

واخبر سليمان الخرس بواردي راعيا اباعر بوادي المياه من فوق ..... سنة طقة الرطبه توهم.......

وشتبي بهم تسعلهم انشدني وانا اعلمك .... حتى انت لو تبيني اعلمك تراي اخبرك .... سنة يصير عندكم سمير بن زيدان الجرباء انت من معهم بواريد امانيات الطوال ..

خذ الوكاد نخبرها سنتها ربيع والفقع يقشونه عن مراح البل.....الله على ها ك الايام يبو يوسف .....

[محمد الطرقي]

الاخ خالد الله يسعد صباحك بكل خير والله يبشرك بالخير انا احسبه شايب ما ابي العب معه
ودامه صقير الله يعينه عليه
شاكر مرورك العطر

[محمد الطرقي]

الله يصبحك بالخير يابو متعب وابن دوهان يقول خالد انه جذع
والا علينا منه نبي نجربعه

[محمد الطرقي]

يابو عبدالله اذا كنت تركض وراة يطرح لك سمون
معناة شايب وانا ماني لا عب مع الشيبان
وخالد عكاش يقول الرجال جذع مارما سنون العقل
وتوة اخذ بطاقة احوال
اظاهر لا زم اشوفه بعيني

[فالح الفليو]

صبحك الله بالخير ياحجي وشلونك وشلون العيال والله اني مشتاق لك لكن الله اعلم بالظروف يابو يوسف والله انك دايم علي البال وماتغيب

صج لسانك يابو يوسف

[محمد بن دوهان]

يالربع العذر والسموحة والله ما إشتغل عندي النت بالدوام من أمس غير هلحين ، وعندي والله إجتماع بس مريت لقيتكم هنا .. والله يسعد صباحكم يارب جميع ، وأرحب بإخوي فالح الفليو أبو فيصل وأقول له يا هلا بك إبيتك يا عزيز الشآن ..

وأما أنت يا أبو يوسف عز الله إنك جبتها على الجرح ..والأخ علي معاشي المؤسس وله الأيادي البيضا بجمع عيال السبعه ولكنها ما جت على مشهاه .. الله يوفقه ويستر عليه وله المعزه ووافر الإحترام ، وبعض الشيبان يا أبو يوسف ودك إن الله سبحانه يحلل ذبحهم وتلخه لك بفشقه وتريحه وتستر عليه من هالدنيا بالذات ليا منه خترش وبعضهم ودك تخيط فمه مشآن ما يزل بحرف ويظل على حشمته
:):):)


خلني أخلص من الإجتماع وأروج عليكم .

[محمد الطرقي]

هلا وغلا بخوي الغالي فالح الفليو وينك يارجل والله اني مشتاق لك ودي بشوفتك
ومحاوراتك الطيبه انقطعت اخبارك حياك الله بين اهلك وربعك وابرك الساعات يالغالي
صح الله بدنك وخلك قريب ابقاك بقسم المحاورة نبي نشعلها

[محمد الطرقي]

ابن دوهان والله يالغالي مامن زلل الامور بسيطه
بس انا صاير مزاجي طرطنقي ما يتحمل وصاير حساس فوق اللزوم

[خالد عكاش العلاطي]

الطرقي انتبه يالباخي انا اعرفه زين من يوم يطرد السمون مثل ماقال الفققي لكن عقله يزن بلد ولكيع

[محمد الطرقي]

والله اني ضعت بينك وبين ابو عبدالله كلا يقول انا اعرفه
انا ابي اشوفه ماغير اسمع صوته بالجوال وصوته صوت شايب
وانت تقول بسن الفطام وابو عبدالله يقول شايب
خلوة يحط صورته ابي اشوفها

[سليمان الخرس]

ماطلبت الا عزك عندي له صوره اللتقطت عام 1412 بالتابلاين قبل لايتقاعد ويسجل بشركة شيفرون

[محمد الطرقي]

ابو متعب الله يجزاك كل خير ياسنايدي حط له صورة حديثه
ولو هي صورت ابو مسامح

[سليمان الخرس]

الليله راح اصوره لك وهو بلبس الدوام

وتشوف بعينك وش كبر عمره بن دوهان
صدقني لولا التعديلات يمديه متسفط

كبر القاع امنا بالله
الله يخليه لعجيزه وعياله يارب

[ابويزيد القماصي]

صح لسانك يا ابو سيف ونحــن ننتظر الغليم ابن دوهان ...

[محمد الطرقي]

تكفى يابو متعب تكفى صورة لي بلبس الدوام ابي اشوف شكله وهو معصب

[محمد الطرقي]

صح الله بدنك يابو يزيد
وخلك قريب تشجعني
تراهم كلهم مع ابن دوهان
شكله عامل لهم دنبشه

[محمد بن دوهان]

الله يسعد مساكم جميع كلن بإسمه يا أهل العرفا ، هذا ما خليتوا بي لون الله يدفع البلا ..

قرب جاي يا بن قهيدان وإستلم والله يجملنا معك يا شاعر أهل العرفا ..

يفداك عفن ٍ طويل لسان=ياللي على الطيب متعني
والعمر لا تقربه يا فلان=عنا العذارى يهجني

وصح لسانك وإعتلا شآنك يا عرفان ولا يهونون النشاما..

[محمد الطرقي]

لا هنت لاهنت يبليهان = وانا اخبر ماخسر ضني

وعن الطلب مالك المزبان = جب الخبر لا تجنني

[محمد بن دوهان]

العمر سلك ٍ على عيدان=وصيور الأيام يقفني
وللشيب في صابري ليحان=مجبور به ما افتخت مني

[فالح الفليو]

المهلي مايولي يابو عبد العزيز وابرك الساعات ونتشرف بكم جميعا

[فالح الفليو]

الغالي علي قلبي والاخ الكبير ابو يوسف مشتاقين لك يالغالي

ابشر انا حولك بس خلنا ناخذ علي الجو شوي تخبر مبطي عن المحاورات

[محمد الطرقي]

أن كان مولدك في نيسان = بخمس وثمانين يرضني
ألعب معك واسبك القيفان=وعلى اللحن كلنا إنغني

[محمد الطرقي]

حياك الله يالغالي وتريح والياروقت ازهمني اجيك
وياملرحبا ملاااايين

[محمد بن دوهان]

إن كانك تلحق الهويان =إعجل عليّه ولا تكني
لي عشقةٍ مثلها ما كان=عنها المنايا ينحني

عشت وسلمت يا راع العرفا وعسى الله يرفع شآنك يا أبو يوسف ويعزك مولاك .

[محمد بن دوهان]

أبو عبدالله وش يبون هالسبعه يوم إنهم بلشانين بعمري الله يدفع البلا والله اللي يسمعهم يقول انهم يبون يزوجونني ..

خالد عكاش / والله يا بناخي قمت اجوض يمين ويسار ابي اشوف شاعر اهل العرفا وش يبي مني

سليمان / والله لو تحط من الصور ياما تعجز انا أصغر منك إنت مثل ماقال أبو عبدالله تخبر العبرتين إنت وأبو يزيد أنا الأكيد أصغر منكم :crown:


فواز / والله يا أبو أحمد يعين الله أبو يوسف بلشان بعمري ويقول إنه يبي ينجن كان ما عرف عمري :(

الله يديمكم ويعزكم يا أهل العرفا ويسلمكم من كل مكروه إن شاء الله .

[سليمان الخرس]

تم الحصول على بطاقة الاحوال الخاصه بمحمد الدوهان

ولكن لاتزال المقايضات جاريه اما بدفع المطلوب
او التشهير به

عاد اذا يبي يذكر مره رحنا للبلديه انا وياه وأخذت بطاقته وصورتها

ومن هذا المنطلق ترا بقوله من اليوم عمي محمد عايد

[محمد بن دوهان]

من أللي طفى الضيان

ولعوا الكهرب ما عاد نشوف

سليمان عووووووووووذه منك
ههههههههههههههههههههههه

كم تبي

:):):)

[سليمان الخرس]

أبليس أنا تعوذني؟؟؟؟
سأعتربها هفوة كبير سن او ميانه علينا من يصغره سنا

أيه الشيخ الطاعن هل لك أن توصي لأبنائك فأنك أوشكت على ملامسة قبرك
<======متأثر من فيلم قبل شوي بالشوتايم


ههههههههههههههههههههههههههه

محمد عايد الدوهان
مواليد الخفجي
سنة 1-4-13

ماني حاط رقم قدام الثلاثه أنتم حطوه

[محمد الطرقي]

خل يتوسط لك سليمان= كانك للخبار مستني
عطنا الطلب واكتب العنوان = نيتاك بالزين ونثني

[محمد بن دوهان]

الفاطر اللي شيبها بآن=ترغي ومع الحيران اتحني
ويا بنآخي من يسكن الغيران=لا يآمن من نطقة الجني


:):):)
:crown::crown::crown:

[متعب عبدالهادي الفققي]

يا راكب الي مع الوديان= ان عشقه با الدبل حني
فوقه غلاما مهو سهران = مافيه شك ولاظني
يحمل رساله لبن قهيدان = رسالة مرسله مني
بخصوص محمد بن دوهان= اقدر سنه كبر سني
يوم انا نسرح مع الطليان = هذا الخبر سجله عني
كم شايبن مزلح الغلمان = قال الغنادير بدني
عنده تجارب مهو فسقان= يقعد مع البنت متهني

[محمد الطرقي]

عسى الحيا يسقي الوديان = ونسرح والا ييبس الشني
سر بالقدم واشرف الضلعان =تراء المراقب يشقني

[محمد الطرقي]

صح الله السانك يابو عبدالله=
ودايم تجيب العلم اليقين=

واسمع الرد يابو عبدالله=

يابن افققي صاحبك زعلان = ومازال كاشخ ومتبني

يقول انا العاشق الهويان = وكل المزايين يرجني

ماني صغير ٍ مع الشبان = ولا ني كبيرٍ يعافني

اصيد واطرح من الغزلان = لو اقترب مايهجني

واليوم انا الشوفهن شفقان = ابطيت والبيض ينخني

[سليمان الخرس]

ههههههههههههههههههههههههههههههههه


صادوه
طلع عليك فوق بيع السوق يابو عزوز

[متعب عبدالهادي الفققي]

هين يا ابو متعب انت تنتظر بن دوهان يبرطلك من اجل ماتطلع تاريخ ميلاده

سليمان طلب اربع خرفان = ثريه يدور براطيلي
من شان يزور لبن دوهان = سوى استماره وموديلي
بلعون ماضنتي يا فلان = تاريخه عندي بتفصيلي

[سليمان الخرس]

أبو عبدالله
الرجال عمره تعدى الخمسين بسنين
وسالفة الغنادير بس حسره على عمر مضى
من الوفره للخفجي

أتحداه إذا مايذكر الوفره يوم كانت صنادق:)

[خليف الدوامي ابو زيدان]

ما شاء الله منورين كلكم مبدعين وليه ماعلمتوني انكم هنيا تهيجنون ؟! تراني مشغلني العمار
وروجاتي قليلة هالوقت 0 قدرو ضروفي 0

هكنهار فرت سمونه من بشنقي ونطلقت تقل طلقه وكان أنقلز وراها ويا الله أمسك مخلابها
وأبي اعطيها هالوغد عندكم ابن دوهان يلعب عليها هههههههه

[محمد بن دوهان]

كل الشكر وعظيم الإمتنان لجنابك العزيز وصح لسانك يا أبو عبدالله وأعلى الله شآنك ووفقنا وإياكم أجمعين لما فيه الخير والصلاح وجمع بني العمومة على ما يحبه الله ويرضاه ويرفع الرآس

كما أتقدم بالشكر للأخ أبو يوسف على هذه المجاراة ولي الشرف بأن أقصد معك يا شاعر أهل العرفا ..


وعمري لو تسألون كل أهل الأرض ما راح يعلمونكم :Glasses::Glasses:

عز الله يا سليمان لحقت على تالي عشيش الوفرة عسى الله يرحم أهله برحمته الواسعه ويطول بعمر من بقي منهم على الهدى والصلاح ..


أبو زيدان أنا جايك إذا الله أشاء وأبي آخذ هالسمونه اللي تقول عنها :):):):)


الفخر وكل الفخر يعلم الله بجمعتكم وشوفتكم يا أهل العرفا

عقال ٍ على رآسي ونيشان عز وفخر عسى الله يسلمكم جميع ..

محبكم والفخور بكم

[محمد الطرقي]

الله يعطيك طولت العمر يابو عبد العزيز

[سعد العماوي]

ماشاء الله مبدعين ياجداني الله يمتعكم بالصحه والعافيه يابنيخي

[محمد الطرقي]

ابببببببببببببببببببببب وش ذا ياسعد كلنا جدانك
كلهم جدانك الا انا عمك
انت عاوز تفضح بنا ياسعد دور غير هسويلفه تراني ما حبها
شاكرين مرورك اللي ما هو زززززززززززززززززززززززززززززين

[محمد بن دوهان]

يالله حي وليدي سعد
ألا كل مرورك حلا وزين
عز الله انك ما قصرت بهم
عندك اياهم بس بناخيي

عز الله لك عندي ذبيحه يا عرفان على هالسالفة

عشت والله وسلمت

:):):):)

[سعد العماوي]

والله يابو يوسف شفتكم هادين تبون حلق ابو عبد العزيز

وازعلتوني بعدين هذا الصحيح انا ماقلت شي خطأ

ههههههه

كلكم بعمر جدي

الله لايهينكم بوجهك يابن دوهان من ابو يوسف تراي ذال منه

[محمد الطرقي]

انا احسب انك ياسعد بالثلاثين = واثرك شايب مالي الشيب راسك
تفزع لبن دوهان وتدور الزين = يصيح لك ينخاك واطلع حماسك

[الشرق]

الله يسلمكم ويعطيكم العافية وحوار ممتع وسالفة العمر الصبغة عند الحلاقين أرخض شيء وكلها ساعتين عند الحلاق ترجع الجميع شباب.

والشباب شباب القلب.

[سعد العماوي]

يستاهل الفزعه لو اني ماني شاعر استلم


ماهو خطا مني ترى العين بالعين = احسب احسابك وانتبه من مداسك
نبي نشوف الحق ثم ناخذ الدين= اوقف تزهب لي بدرعك وطاسك

[محمد بن دوهان]

عز الله ونعم يا أبو سليمان

عفيه بنآخيي

صح لسانك وبنانك

وأنا معك وبصفك

<=== ما من غيري أنا وياك

كلهم ضدنا ، بس عين عيونك وأنا بنآخيك ربك يجيبهم هالشيبان



:):):)

[سعد العماوي]

الظاهر ان الشيبان مايبونا نطلع فضايحهم

[محمد حمدان الرسلاني]

يالله حسن الخاتمه

يابوعبدالعزيز اشوف شيبانا تقل ياخوك بهم طمع شوي الواحد منهم يبي يعيش عمره

وعمر غيره

ماعليك يالبناخي الظاهر هذي الغيره الله يدفع البلا ولا انت وحيك وحي شباب

يعني تقول بالثلاثين حولها والله اعلم

[متعب عبدالهادي الفققي]

ترايه ظالم لبن دوهان = وظلمي وصل محمد الطرقي
وجنيت جنايه على سليمان= وقلبي من الظلم محترقي
سنيات مضت وهم وغدان = شباب ولابينهم فرقي

[محمد بن دوهان]

الأخ العزيز أبو حمدان سلمت وغنمت ومعرفتك والله شرف يا بنآخي عسى الله يسلمك ويرفع شآنك .

[محمد بن دوهان]

أبو عبدالله صح لسانك وبنانك طال عمرك

وإستلم طال عمرك والعذر والسموحة عن الزلل والقصور بس تراكم ظلمتوني وأنا بعدني شباااااب

:):):)



يا محلا رفقة الشيخان=وعن ظلمهم لا صرت متقي
والكبر عذرب كبير الشآن=وما به معابه ولا اتعرقي
مار البلا شوفة الغزلان=تودع محانيك تختفقي


:):):)
وصح لسانك طال عمرك وبنانك مرةً أخرى

وعقال والله على الرآس يا أبو عبدالله عسى الله يسلمك ويعافيك ونيابةً عن سليمان والطرقي ترنا سامحين ومسامحين بس بشرط إنكم تدورون لي مره وتزوجوني غير كذا ما نسمح لا أنا ولا ربعي

والسابق تطلعها يدها

[فارس تراك فارس]

با زين اللعب اللي زي كذا


عز الله اني استمتعت في ما قريته هنا عشان شعر الشيبان يطربني حيل خصوص لا كان يحمل نفس هذي الروح الرائعه
يمكن ابن دوهان اعترف بالشيب اللي أكده الفققي بأعترافه اما الشاعر الرائع ابو يوسف لو انه رمى الشيب على لابن دوهان نسى ان الطرق طرق شيبان خص شيبان ربعنا تحديدا ليكون شاهد على شيبه :)



والعلم عند الله

يا طيب الروح الأخويه اللي طغت هنا

الله يبيض وجيهكم حضور ولا اروع



من الثلاث شيبان المشتركين بهذا لجمال

تقديري واحترامي لكم

ولا هنتوا

[محمد بن دوهان]

هلا باخوي فارس والله أظنك أكبر منا كلنا وإظن أننا من جيل عيالك يا بنآخي مار عساها على حظ بن طرقي يوم إنه بغى يشكي مالقى غيري ولا لقى غير هالسالفة يبحث خفانا بها ..ومحسوبك عمره عسى عمرك طويل سبعة عشر ربيعاً ونص فقط لا غير ..

وأكتفي بشهادة أبو عبد الله متعب الفققي بأنه قد ظلمني ولكنه حتى بإعترافه الأخير قد وضع بن طرقي معاي وبأنه قد ظلمه معاي وهذا شيء والله لم يجوز لي ولم يرضيني ولكن الشكوى للي ما تنام عينه يا بناخي

:):):)

ونيابةً عن صاحب الموضوع أقول لك مرةً أخرى يا عزيزي ، يا هلا بك كثر ما مشى على القاع مخلوق وبإعداد ما خلق الله ..

[محمد عسكر]

الأبيات جميلة والأجمل تعليقات الأخوة :)
الأخ ابن دوهان مهي راكبة أبد سالفة سبعة عشر ربيعاً ..
وعموماً سبعة عشر أو سبعة وعشرون أو سبعة وثلاثون أو سبعة وأربعون أو خمسون أو ستون تبقى ابن دوهان ذاك الرجل النشمي الأجودي..
أنا شفت صورة لك بالبشت وعلى كلامك ليلة العرس كانت ويبدو أنها قديمة ( سنة السبلة ) :)
الله يطول بعمرك وصح لسانك أنت وبو يوسف وبو عبدالله الفققي

[محمد بن دوهان]

هلا وألف هلا والله يا أبو عسكر وأبرك الساعات والله شوفتك يابنآخي ..

والعمر مازال ولن يتغير شاء من شاء وأبى من أبى وسأبقى بالرغم من أي محاولة تحاك ضدي بأن يبقى عمري سبعة عشر عاماً ونصف
:):):)

لك المعزه والمودة والإحترام

وكن يا عزيزي برعاية المولى عزيز الجلال وحفظه أينما كنت

[عايش العجلاني]

سنة الدفرات والحساب عليك :)

[سليمان الخرس]

طببوه الفيضه
ههههههههههههههههه

بن دوهان قايلك لاتتهور وتنشر صورك
لأن لو حطيت مثل صورة عرسك بدون تجاعيد الوجه
باين من الالوان أنها من سنة جدي

ياجماعه والله انكم ظالمين هالادمي

تراه صغير كبر فواز مواليد 1409 وفواز 1411
ناين ون ون :)

[محمد بن دوهان]

ههههههههههههههههههههه

ياهلا ومية هلا

الشكوى للي ما تنام عينه يا أبو حامد ..

ليه ما تقول سنة مقيض طريف

ههههههههههههههههههههه

[محمد بن دوهان]

أبو متعب الله العالم إني أصغر منك حتى إنت
وأبو الفوز الله العالم إنه سنة مقيض الزرقا
وش جابه لي الله يهديكم بس

ياكبرهااااااااااااااااااااا

هههههههههههههههههههههههههههه

[عايش العجلاني]

طيب تعال شوي خلني اسئل ,,

اذا ولد ولدك عمره 18 سنه ..؟ كم يكون عمر ولد الله يخليه لوالديه ..؟

يعني الصراحة راحيه يابو عزوز ,, شايب وعلى عكسات وليامن امسى الليل تقوم تطامش ماتشوف الي حولك :)

,,,,,

واذا مارضيت رح راجع سليمان وترضى ..

فواز راح اجيب لكم تاريخ ميلاده باليوم والساعة والشهر والسنه والي مايصدق يروح يسئل ابو شامه :) عنده الخبر اليقين

[سليمان الخرس]

لا من ناحية اصغر مني فانت اصغر مني
والدليل ان محد قرا بطاقتك الشخصيه حتى لما سافرنا مع بعض
تعمدت انك تدسها عني

مو الواحد يمشي من عيال جيله؟
انت عمري ماشفتك الا مع مونس وابو هادي
وكلهم الله يعطيهم طولة العمر تخطو السبعين

ودنا نفهم يابن دوهان

[متعب عبدالهادي الفققي]

مريت من هنا هذه الساعه المتاخره من الليل
مع سماع صوت اغنيه سهران لوحدي اسمعها وانا اتصفح الحوار الادبي الجميل واطلعت على كل الاسماء اسماء الاخوه الكرام الذين مرو على هذا التحاور النظيف الممتع واقول عساكم بخير والله يرزقنا بلقائكم عن قرب ولا نقول

اضحى التنائي بديلا عن تدانينا= وحل عن طيب لقيانا تجافينا

صارت من الذكريات ونحن امس كنا فيها..............