من خلقت الدنيا تجوع الذيابه @@ بس المهم تعيش والراس مرفوع

[شامخ]

رشيد الزلامي من الشعراء الذين يجب عليك أن تقف عند شعرهم وتتمعن في جزالة الأبيات وحكمتها

شاعر يعتبر على رأس الهرم في عصرنا الحاضر لأنه شاعر قد جمع بين عصرين ومهما تكلمت عنه لااوفيه حقه. وماعليك إلا أن تقرأ الأبيات هذي وتحكم بنفسك.



الوقت يامقسى عناه وعذابه=حطاب ليل وله معاوين وفزوع

أحد ٍ مِنه يمكن يعالج صوابه=وأحد ٍ يموت بعلته موت جربوع

يروح مثل مقاط مااحدٍ درابه=لاحبل يرقابه ولا صوت مسموع

بغا يجيب رشاه ورشاه جابه=من عالي الشفه ضرب به على القوع

هذا مقاط اللي رشاه التوابه=وأصبح مثل للناس في كل موضوع

قصت مقاط وقصتي ماتشابه=أسباب وقت وكل قصه لها نوع

مقاط صفى في زمانه حسابه=وأنا بلشت بوقت طامع ومطموع

ناسٍ يحسبون المراجل نهابه=وهيه عليهم كنها حبة الكوع

ودك بعضهم تربطه في رسابه=تصبح وتمسي فوق راسه بكرسوع

كم واحدٍ وقت اللزوم تهقابه=وأليا نصيته غير الطبع بطبوع

الصاحب اللي صحبته ضحك نابه=يبيني أبقى له على الدوم مزروع

لا شاف وجهي قال يامرحبابه=وإن غبت ينساني على راس الأسبوع

واليا نسيني منهو حضرة جنابه=أنساه واجعل دونه الخط مقطوع

وعيبٍ عليه كان طقيت بابه=لو إني أمسي بالخلا ميتٍ جوع

من خلقت الدنيا تجوع الذيابه = بس المهم تعيش والراس مرفوع

وتكسب بعز النفس قدر ومهابه=وتمشي على خط ٍ سليم ٍ ومشروع..

[عبدالعزيز المعني]

صح لسان الشاعر
ولسانك
و رشيد الزلامي
غني عن التعريف
قصيده جميله اعجتني كما اعجبتك

[ابو شامه]

صح لسان الشاعر ويعطيك العافيه اخي شامخ على هذا الاختيار الجميل

[شامخ]

ياهلا ويامرحبا اخوي عبدالعزيز



مرورك يشرفني واعتز فيه



لاهنت طال عمرك

[شامخ]

ابوشامه الله يعافيك يالغالي



ولاهنت على مرورك الجميل

[متعب عبدالهادي الفققي]

شامخ
اختيارك لهذه القصيده تدل على انك ذيب من ذيابه .وانا ما اشك بهذا ابدا

هلا والله والف هلا

[محمد الطرقي]

صح الله السان رشيد الزلامي

وكل الشكر لك على النقل الرائع والذوق الرفيع

احترامي

[خالد الشويكي]

من خلقت الدنيا تجوع الذيابه


صح لسان الزلامي .. وصح منقولك يا شامخ

[محمد بن دوهان]

هذه هي عزة نفس العربي الأصيل

والله ونعم فيك وبالزلامي يا بنآخي

وإنت من ناسٍ لهم باع ٍ طويل بالمرجلة والكرم ومن ناسٍ ليا غابوا الناس تفقدهم ما هي سوالف كذوب عند نسوانه ..

عشت وسلمت وعسى الله يحفظك يا بنآخي

وأسأل الله لنا ولكم دوام الصحة والعافية والستر بالدنيا والآخرة .

[شامخ]

يامرحبا باخوي متعب
ماعليك زود طال عمرك
والله لايهينك على مرورك وتعليقك
تقبل تحيتي ودمت بود

[شامخ]

اخوي محمد الطرقي

حياك الله طال عمرك


والله لايهينك على مرورك وتعليقك

تقبل تحيتي ودمت بود

[شامخ]

اخوي خالد الشويكي ياهلا ومرحبا



الله لايهينك طال عمرك على مرورك الرائع



تقبل تحيتي ودمت بود

[شامخ]

اخوي ابن دوهان ياهلا ومرحبا



ماعليك زود طال عمرك وانت راع الاوله



الله لايهينك على مرورك الرائع وشهادتك اعتز فيها واضعها وسام على صدري



تقبل تحيتي ودمت بود

[محمد بن دوهان]

وجدت في إحدى المجلات هذه القصيدة الجميلة للشاعر الكبير رشيد الزلامي وأحببت أن أضعها هنا مع موضوعك الكريم عن هذا الشاعر العلم ، ويا حبذا أننا إستطعنا أن نجمع أشعاره المتبقية، لأنه يستحق أن يقرأ له بتمعن ، فهذه قصيدة من قصائده العصماء والداله على عزة النفس والكرامة والإعتداد بالنفس ، حيث قال :

قالوا تعلمت قلـت اعنـاد وفراسـه
اعاند النفـس والدنيـا وصارعهـا
ودرست في مدرسة من شيبت راسه
دنيا العنا اللـي قصيفـاةٍ مطامعهـا
تلميذهـا دايـم تكتـب بقرطـاسـه
وتعطيـه جملـة دروسٍ مايضيعهـا
والله عطانا نظر وشعـور حساسـه
ناخذ علوم المعرفه مـن مراجعهـا
ونساير الوقـت ونقيسـه بمقياسـه
ونواجه النفـس بالواقـع ونقنعهـا
وترى حياة الفتى مهما قوى باسـه
محفوفةٍ بالخطـر والمـوت تابعهـا
من مبتدى العمر حتى يلفظ انفاسـه
يمر فـي مرحلـة تكثـر زوابعهـا
أول حياة الفتى مشـوار وعساسـه
مسافةٍ في عجـاج العمـر يقطعهـا
وثاني حياة الفتى تدريـب ودراسـه
تصعب ظروف الحياة وينشغل معها
وثالث حياة الفتى يرجع على ساسـه
النقطه اللي بـدىء منهـا يراجعهـا
يآصل لسن الهرم ويضيـع الطاسـه
ويزحف مع الأرض ويخطط شوارعها
وليا تلاقت متونـه ورتخـى راسـه
ضاعت جميع العلوم اللـي يجمعهـا

وكل الشكر مرة ً أخرى لك أخي أبو شامخ على فتح الباب على هذا الشاعر العلم .

[الشرق]

أخي شامخ اختيار موفق جدا وينم عن احساس شاعر يملك من الذوق الشعري والكلمة ماهو راقي جدا.

صح لسان الشاعر وكلامه واقعي ومنطقي جدا.

[عايش بن ساير الشحيتان]

اخي شامخ ابداعك مميز وانت وضعت نفسك مكان الشاعر عندما نقلت قصيدته
وصح لسان الشاعر
ايضا ابن دوهان نقل لنا قصيده لاتقل عن مستوا القصيده الأولى

[شامخ]

الله عليك اخوي ابن دوهااااااااااان اثراء لامثيل له للموضوع



لاهنت يابوعبدالعزيز

[شامخ]

اخوي الشرق ابوعبدالرحمن


الله لايهينك على مرورك الرائع وتعليقك الكريم



لاخلا ولا عدم

[شامخ]

اخوي عايش الشحيتان حياك الله طال عمرك



والله لايهينك على مرورك الكريم



لاخلا ولا عدم