معـلقـة الـراتـب

[خالد عكاش العلاطي]

حلوة القصيدة ووزنيتها متعوب عليها

مانـي متابع للسيـاسة والأخبــار
ولا همـني أوباما ولافوز ماكـــيـن
ولا همني وش قال حسني وبشار
وما همني لو زادوا الهند والصين
وما همني لو سوق الأموال منهار
وماهمني لو كان خسروا ملايـين
ماهمني الا راتبي ذا الشهر طــار
كله صرفته يوم خمسة وعشرين
بعثرت مدخولي على يمين ويسـار
وقعدت وعيالـي نصفّـق بـكفــين
1300 عـلـى طـــول فــ إيــجــــار
و400 مصروف جوال في زين
و 1150 في شــركـــة إعـــمــار
قرض ٍ أخذته وشفطـوه الشياطين
و1100 تجديد وأتعـاب سـمــسار
عندي استمارة مطوفة حول عامين
و400 فــاتــورة المــاء والأنـوار
حـتـى ولـو كـنّـا للأنــوار مـطـفـيـن
وأمــا 800 بـســوي بها الــكــار
سـيارة ٍ جـربـا ثــلاث وثــمـانـيــن
لا شـمـة الراتـب يجـيها كـما الزار
تنـفض مكيـنتها كما نـفض بوكليـــن
وام العيال تـصـيح يا زوجي البار
هذا الشهر عندي في القصر عرسين
احتاج انا فستان من عشرة امتـار
وأفصـله يا فـالح الـراي بـألفــــيـــن
وأخر مئة بتروح في جيب كومار
الحارس الهندي عسى فـاله الشـيـن
ويقـول ما تـكفـيـه للفـلفـل الحــار
زعلان يبغى فوقها زود خـمســـيــن
وزادت معانـاتـي مع زود الأسـعار
أصبح مثل ما قيل طاق ٍ بطاقـيــــن
أزمة مسـويها مــداهن وتــجـــــار
وراحوا ضحيتها الضعوف المساكين
منـحاش من نـار ٍ وطـبيـت في نار
ويا ويل حـظ اللي وقــع بيـن نـاريـن
وإن الجمل صابر على الضيم صبّار
وان طاح تكثر في جنوبه سكاكـين
أبديت ما في الصدر من هم واسرار
بأقولها واخلي الخافي يــبـيــــن
يا شيوخنا لا لا تغضون الأبصار
صار المواطن يشكي العسر والدين
وانتم به ادرى ياطويلين الأعمار
بالله عليكم شوفوا الوضع بالعين

[محمد بن دوهان]

قصيدة إجتماعية هزلية وواقعية في نفس الوقت وصاحبها مبيّن عليه مبذر حيل وشكله ما يكفيه شي لو راتبه مليون..

شكراً لك أبو وليد على إتحافنا بها

وكن ياعزيزي برعاية المولى عز وجل وحفظه

[فواز الشويكي]

قصيده على الجرح ,,,,,,,,
يعطيك العافيه خالد

[رحال]

قصيدة هزلية

ولكن بلايمين وبلايسار يضبط الراتب ويعدي الشهر كله.

[عبدالعزيز المعني]

ماساه اقتصاديه الله يعينه

الله يكون بالعون

[سالم الشويكي]

خالد : هذى الحال لكثير من الموظفين
نقل موفق الله يعطيك العافيه

[عايش بن ساير الشحيتان]

هذا حال أغلب الشعب مافي شي جديد اللهم انه صاغه بقصيده ولم يذكر بعض الالتزامات بل ماخفي أعظم وأغلب الشعب يتعفف ولا يبيح سره لأحد بحاجته ووضعه المتدهور والله المستعان
فإذا كان هذا وضع الموضف فماذا نقول عن العاطل الذي لايملك دخل ولو ريال
وماذا نقول عن الموضف الذي راتبه لايتجاوز8000 واقصاده 5000وعنده التزامات ويعول 21 واحد وعشرون نفس (الله يكون بعونه)