~سجّل حُضورك فِي بيَت شِعر مْن اختيارك~ [الأرشيف] - شبكة منتديات قبيلة السبعة من عنزة ( أهل العرفا )

محمد بن دوهان

05-21-2010, 02:33 AM

عليكم السلام ورحمة الله وبركاته
والله يسعدك يا أبو وليد على هالإختيار الجميل

عساها على حظك تالي هالليل

عز الله إنك تبي تذبح خلق الله وتهبلها تبيهم اذا مشوا بهالاسواق بس يتلافتون ..

وما دامك إبتديت بالغزل فلا يوجد أكثر من بن لعبون إجادة ً بالتوصيف حين قال رحمة الله عليه :

حي المنازل تحيـة عيــــن =لمصافــح النوم سهرانـــه
والاَّ تحية غريـم الــديــن =معســر ووافاه ديانــــه
منزل فريد البهـا والـــزين =عطبول مكحولــة اعيانــه
ودي بنسيانهــا ومـن ايــن =ينســى محمــد لخلانــه
اطيـع انا في هواه اثـــنين =سلطان قلبــي وشيطانـــه
اتبع هواهـا من اين إلى ايـن =واحظـى بشوفـه ورضوانـه
وابغضـت الادنين والاقصيـن =واحببـت قومـه على شانـه
يالايمي به شويــن شويــن =ديّـان قلبــي وديوانـــه
ما شفـت برقٍ سري ما بيـن =ذيـك الحواجــب بليوانــه
وما ذقـت مابي رمـاك البـين =بيـن شفتيهــا و برهانــه
ومجـدَّلاتٍ علـى المتنيـــن =سافات خانــه على خانــه
والبطن والخصـر والنهديــن =والعنـق والعيـن وأوجـانـه
والورك والسـاق والفخـذيـن =من بينهن فلقــة الدانـــه
ولا دعـاك الولـع ياشـيــن =دعـوى المـدوه لظميانــه
وين اشتكـى ما دهانـي ويـن =مشكـاي لله سبحانـــــه
واقول يا أهـل الهوى عزيـن =ما قال محســن لعثمانــه

وآآآآصل

جاك يا مهنا ما تمنى
وتم عمل ما يلزم

:):):)

خالد الشويكي

05-21-2010, 04:15 AM

هههههههههههههههه

مابعد اللي جبت شين يابن دوهان عزالله ماقصرت

لا والله اللي ماناموا ..... استلم يالسبيعي

بحر الهوى صار يلعب بي
والبنت حـــلــــوه ولهلوبه!

لـــو ماني انسان متربي
حققت للذنب مطلــــوبه!

محمد بن دوهان

05-22-2010, 01:31 AM

:):):)

هلا بالعزيز الغالي

إستلم يا عرفان ، عين عيونك وأنا بنآخيك ، يقول لك راع الفن :

يا راكب اللي مهي دنّا=منوة غريب إيدنيها
لا روح الجيش يا مهنا=يا بعد مرواح راعيها
حمرا وبرها تقل حنّى=مثل السراويل بايديها

ابو شامه

05-22-2010, 12:55 PM

اضحك حبيبي دام غيري مسليك

بكرة تموت من القهر لا نسيتك

خالد الشويكي

05-22-2010, 06:24 PM

أحلى مقادير الزمن جلسة إثنين=يقضونها بين الدلع والمودة
هذاك يعبث في صدر كامل الزين=والزين يلعب في خيوط المخدة
مااحدٍ درى عن شرقة الشمس من وين=أحظانهم مع بعضهم مستبدة

محمد بن دوهان

05-23-2010, 04:32 AM

أسعد الله صباحك يا أبو وليد بباقة ورد باريسية لا تزهوا إلا للأحبة الغوالي ، إستلم : وياليت عندنا مثل هالذلول :

يا راكب اللي مديده زين=ما ضيقت صدر راعيها
تخم نجد وتجي هلحين=والشمس ما غاب تاليها
اسرع من ارماشتك بالعين=وارماشة العين تلهيها
تيهية بس له ضلعين=ومقولمات مواطيها
تزها الميارك وخرجٍ زين=وعِوِيد موز ٍ ايغديها
وسفيفاته على ثنتين=والثالثه عنك ترميها

فواز الشويكي

05-23-2010, 10:41 AM

صباح الخيرات ايها الاحبه ,,,

افهمك لو ما تكلمت افهمك ********* ما بقلبك فى عيونك يرتسم
ما تزيل الشك ضحكة مبسمك********يفضحك وجدان واشجان وندم

متعب عبدالهادي الفققي

05-23-2010, 11:48 AM

l هين ابي اروح لريس الهيعه وابي اعلمه عليكم
تراه يحبسكم . انا علمتكم .
بس اسكتو عني واسكت عنكم

ياغازي قلبي لهبه نار=نارن على الكبد مسطاها
انا بلايه من المسيار = عذابنا يوم شفناها
بين الشفايا حليب بكار= جمال واللبس يزهاها
ليت الهبايب لنا تندار = هنيت من نام بغطاها
تسوى حلالً مع التجار = والفله الي بنيناها
من حر مابي بيحت اسرار= عليك يا خوك ما كماها

ابو عبدالله

محمد بن دوهان

05-23-2010, 11:59 AM

يا نعم والله بك وبغازي يا أبو عبدالله وعسى الخير فالكم أجمعين وعقال والله على الرآس ..

خالد أبو أحمد :
حسب ما أراه أنه قد أصبنا بنيران صديقه مثل ما يقولون بأخبار حروب هاليومين ، كل يوم ذابح ومذبوح ويقول لك ما عليه نيران صديقه ، الله يكفينا شرها يارب..

يا بنت لو هو يجيك خليف=ومخضب ٍ روس الأصباعي
لا يعجبونك عيال الصيف = حشو الزلق عقب مرباعي

وأنا أبي أدور لي كفيل من هلحين

ابو شامه

05-23-2010, 12:57 PM

عرفة وجيه!!

ياكثرهم .. لا قلت لك .. عرفة وجيه
وياقلـهـم .. لا قـلـت .. قــدر ومـعـزه
:
رجـلٍ .. تعـزه بعـد ماتلتـقـي .. فـيـه
ورجـلٍ .. قبـل ماتلتقـي بـه .. تـعـزه
:
ورجـلٍ .. تـرزه بالمجـالـس مبـاديـه
ورجـلٍ .. فلوسـه بالمجـالـس تــرزه
:
ورجلٍ .. يموت ولا يجيبـون طاريـه
ورجل ٍ .. يجي طاريـه فـي كـل حـزه
:
ورجلٍ يهزه .. بعض موقف ويشقيه
. ورجلٍ .. مهوب أيّات موقف يهـزه
:
ورجلٍ .. ضعيف .. ويستفزه معاديه
ورجـلٍ .. كـلام اعـداه .. مايستـفـزه
:
ورجلٍ .. تلزه يعترف لـك .. بخافيـه
ورجـلٍ .. علـى خافيـه .. محـدٍ يلـزه
:
ورجلٍ .. يوزونه .. ويزعـل بنيخيـه
ورجلٍ .. يزعّـل مـن يحـاول ، يـوزه
:
ورجلٍ .. تكـزه لا زم انـك .. توصيـه
ورجـلٍ .. بلـيّـا مــا توصـيـه .. كــزه
:
من لا فرش .. للمرجلـه .. ماتغطيـه
ومن لايخز .. النـاس .. محـدٍ يخـزه
:
ان كنت تعرفني فهي .. عرفة وجيه
مو شرط لك بالقلب قدر .. ومعـزه

خلف المشعان

فيصل العنزي

05-23-2010, 05:27 PM

حكمة لكل زمان ومكان

وما أحد من السن الناس سالــــم
ولو انـه ذاك الــنبي المطهــر
فان كان مقـداما يقولون أهـــوج
وان كان مفضالا يقــولون مـتزر
وان كان سكيتا يقــولون ابكـــم
وان كان نطاقا يقولـون مهـــذر
وان كان صـواما وباللـيل قائمــا
يقولون كــذاب يرائي ويمكـــر
فلا تحتفل في الـناس بالذم والــثنا
ولا تخش غـير الله فـالله اكبــر

خالد الشويكي

05-23-2010, 08:12 PM

ثلاث حبات خـال حول مبسمها

والمنهل العذب تكثر حوله الزحمه

ولا يوقف

محمد بن دوهان

05-23-2010, 09:09 PM

خالد إنت وين تبي يا بناخي تودينا والله تبي ترمينا لنا بهبية وتبينا أنتعرض للقصف من النيران الصديقة تالي وقتنا

:):):)

تدري إستلم عين عيونك والعمر فاني

أول كلامي في هجينيه=يهيجنه كل هجاني
ترى اسمها جاك برحيّه=أبجد ولا فيه ريحاني
ثلاث ميّه ورى ميّه=وازيدها واحدٍ ثاني
قلبي خذيتيه يا شقيّه=واودعتي القلب ريعاني
بالحلم جتني خلاويّه=حبيتها حبّ شفقاني
ياليت حلمه وكد ليّه=وش خانت الحلم خوّاني

وعساها على حظك يا خالد

خالد الشويكي

05-23-2010, 09:42 PM

ههههههههههه القصف نوب يجيك ابلا سبب .. وحنا على وضح النقا ربي لك الحمد

لا هنت واستلم

كل الجميلات كفه وأنت في كفه
مافيه قبلك ولا بعدك جميـلاتِ

الملح في وجنتك والشهد (فالشفه)
حلاك ذاتي وملحك يا حـلا ذاتي

يانهر من ماك للصادي على الظفـة
شربة تبل العروق وتطفي آهاتي

جيت الطبيب وكتب لي شوفتك وصفه
بيديك وحـــدة كيـــاني وأنقســـامــاتي

محمد بن دوهان

05-23-2010, 09:49 PM

خالد أنا ضيعت نظاراتي

خلني يا أما ألقاهن وأرجع لك

:):):)

<=== من شاف نظاراتي

خالد الشويكي

05-23-2010, 10:37 PM

:)

الوقت وقفنا على درب مسدود
الله يسامح سلم( خالي وعميّ !)

والله ماخذت من التقاليد ياكود!
جرح اللهاة وكسرقلبي وهميّ

محمد بن دوهان

05-23-2010, 10:59 PM

هيهات

إبعد شكوكك ما مع الما مويهات=اللي تضايق منه وينه ووينك
يا مرخص الغالي على النفس هيهات=أحط غيرك في المحبة وزينك
حبى لك أبديه ولا به مراوات=ما همني رآي الذي حاسدينك
نسّيتني في الحب كل الذي فات=وأبرت جروح القلب لمسة يمينك
أحييت فيّ الأمل عقب ما مامات=باخلاقك اللي زينها مثل زينك
حب ظلمني واودع العمر مآساة=نسيت ما سواه كرما لعينك
ما انسى جميله دام بالقلب نبضات=فضله عليّ الجمع بيني وبينك
وأحبابي أقفوا غصب من غير مشهات=من شافوا قبالك وهم عاقبينك
عرفوا أن قلبي ما لهم فيه طمعات=من شعشعت به شمس صافي جبينك
بعد الحزن مَليت عمري مسرات=وسلمت لك قلبي خذه في يدينك

شعر صاحب السمو الملكي الأمير عبدالله الفيصل
غفر الله له ولوالديه وللمسلمين أجمعين

خالد الشويكي

05-23-2010, 11:19 PM

الضــيقـة اللــي تقلبّنــي واقّـلبـها

يالله عساها طواري ليل وتعدّي

محمد بن دوهان

05-23-2010, 11:25 PM

عز الله هيضتنا يا خالد عسى الله يسلمك وذكرتنا بالذي نبي ننساه ..
إستلم عسى الله يزوجك .. وعسانا نحضر عرسك وعلى روس الحضور نكون ..

سلام يا عين الغزيّل ليا سج=يا خشف ريم عاودت عقب هجه
يا اخو فهد لا احرك الباب وأهج=ان هج قلبي تسعة آلاف هجه
عليه دمعي كل يوم تزعج=تزعيج موج الأحيمر يزجه
يا لايمي يضرب برآس المزرج=مشلشل بين الإباهر يخجه
متى متى عسر الليالي تفرج=يسج سجاج بقلبي يسجه

شعر : فهد بن دحيم

خالد الشويكي

05-23-2010, 11:57 PM

في محاجرها اشــوف الناس هـزلين وْ فقارى
و بشفايفها يضيع الشوف وِيْحَــــاس المرير

فتنــة ٍ لا مـرَّت الشيبـان خلَّتهُم سكـارى
دفْـع البلا أعقلـهم اللي لا إعرضت دربه يطــير

محمد بن دوهان

05-24-2010, 12:13 AM

عز الله أللي طرنا
وعقب قيفانك أللي توردهن علينا
دونك أخي إنطحني ترني جيتك
يقول لك :

قافٍ سمعته كل ما مني ارتج=واصبحت مدري يا عرب وين أوجه
أنا من القاف الغريب أتخرج=الوادي المجهول أسنع مدجه
يالجتي لجة محال اليا لج=ليالها وأيامها مستلجه
عليك يا راع الحجاج المدعج=دالوب قلبي كل بحر ٍ يرجه
كنه هديب الشام في موسم الحج=في ماقفٍ تسمع للأصوات ضجه
الود عقب صخيف الروح يسمج=فرقى الذي ما تقبل النفس، حجه

شعر / عبدالله اللويحان

خالد الشويكي

05-24-2010, 12:47 AM

ألقف...... ألقف

الجوع كآفر وانت ماترحم الحال

وانا عليك من الولـــه ميتٍ جوع

محمد بن دوهان

05-24-2010, 01:42 AM

أقول والله غير تودرنا ورى لاها

بس أنا مضبط كفيلي أما أنت فدور لك كفيل يا أبو وليد

جآآآآك

يقول الهزاني :

ليلة يجينا السيل يا زيد وافيت=موضي الجبين وسيد تلعات الأعناق
شميت ريق مجدلاته ومزيت=ضواحك ٍ ما قبلي أحد ٍ لها ذاق
جلست أنا وياه في ربعة البيت=سقوى انتساقا بيننا خمر الأرياق
وسقاني العسل المصفى وثنيت=خمر ٍ وأنا سقيته حليب ٍ وترياق
يوم ارجهن صويحبي وارجهنيت=والكل منا عقب خمر الهوى فاق
فهقت راسه بالجدايل وقنيت=وردٍ على خده كما صفح الأوراق
رفعت راسي للكواكب وراعيت=وإليا نور الصبح بادٍ بالأفلاق
بغيت أقوم وشد ردني وشديت=جِيده وحبيته ثمان ٍ على ساق
وحلف علي ّ ان قمت من ذا وشديت=إلا انت معطيني عهود وميثاق
إنك تعود لي ليا منك اقفيت=وإلا لغيري من هوى البيض تشتاق
واقسمت له بآيات عمّا وبالبيت=والمدعي اللي بنا سبع الأطباق
إني فلا غيرك من البيض هاويت=ولا الغيرك من هوى البيض مشتاق
أنا الذي من حر فرقاك فريت=أنوح كالبهلول في وسط الأسواق
ياما طلبت الله ويا ما تمنيت=ويا ما دعيته عند حزات الاشراق
ويا ما دعيته بالمساجد وصليت=ويا ما شحذت الله قسّام الأرزاق
يبني إلحالي من جنان العلا بيت=ومن الثمر نقطف ثمر كلما لاق
عسى اليا رق البكى واستمريت=بمنقشات الريش زينات الأطواق

وتصبح على خير ومسره يا أبو وليد

وأسأل الله أن يزوجك ويكفينا وإياك شر بنات حوا

خالد عبدالعزيز الرسلاني

05-24-2010, 01:49 AM

░▒▓أقعد وأشب النآر وأذكر وليفي▓▒░
░▒▓وبحجة الدخآن أبكي على كيفي▓▒░

فواز الشويكي

05-24-2010, 09:12 AM

ولعت ,,,,,,,,,كل هذا من امس وجاي !!!!!!!!!

خالد الشويكي

05-24-2010, 09:46 PM

اي بالله ولعت البارح والساتر الله ... انت بس خلك قريّب يابـو احمد

أستلم هذى لعيونك ....

ياليتنـــي نامـــس واقرصـــك لانمت

وامص دمك يالغضي مص سن توب

أقرصـــك بالليــــل وانحــاش لاقمت

وليـــا رجعت لنــومك اجيك مــاتوب

ازن فإذنك زن ما حاصـــل ٍ صمت

واجر مـــــــوالي على كل مسحوب

مقدر على بعدك على دمك ادمنت

انا اشهد انه عندي الذ مـشــــروب

محمد بن دوهان

05-25-2010, 01:19 AM

يا هلا والله با أبو أحمد ، والله يسعد مساكم جميع ، أبو وليد مشعان بن هذال رحمة الله عليه قال :

يا موقدين النار جوكم مسايير=ولهن على ضيانكم توقدونه
الله يطيّب فالكم يالمناعير=بسلام ٍ أحلى من روايح امزونه
يابو ثمانٍ واضحات مفانير =غرو يغذي بالشمطري قرونه
ماكولها تمرة شثاثا وابا القير=وشربه حليب امبرد ٍ في صحونه
ما وقفت تمشي بسوق الحواضير=لبسه طربزون ايتخثع اردونه
بيني وبينه فرقتنا المقادير = وكم واحد بيديه يطرف عيونه
وجدي عليها وجد من طاح بالبير=خم الرشا وحال ازرق الجم دونه
او وجد من صكت عليه المشاهير=ازرو هل العادات لا يظهرونه
أو وجد راعي هجمة به خواوير=حال الرمك وامسطر الغوش دونه
امس الضحى عندي بوسط المقاصير=واليوم عني مبعدات ضعونه
على اشقح خلف السلف والمظاهير=يتلي قطيع مغتر ٍمثل لونه
علمي ورد الشميلي وابا القير=اقفى مع الفدعان تطرخ اضغونه

سعد العماوي

05-25-2010, 01:52 AM

بعـض البشـر مثـل النجـوم المراهيـش انـــوارهـــم تـــزهـــي بـــالافــــراح بـــشــــه
افـكــارهــم ري الــعــقــول الـمـعـاطـيــش فـــي الـديــن والـدنـيـا لـلاخـيـار هـشــه
وبعض البشرعقله من التبن والخيش لــو زان شكـلـه داخـــل الـــراس عـشــه

فواز الشويكي

05-25-2010, 09:26 AM

معاكم يا الربع !!!!!!

لاتحسبين الغير أثّر على ( القلب ) ..
.. مافيه أي إنسان [ أسمع كلامه ]
جيتك .. ولا فكّرت في آخر الدرب
.. أمشي معك رغم العتب .. والملامه
برد وسلام بداخلي .. وداخلك ؟ حرب !
.. ملّيت أدوّر في " (http://vb.lamst7b.net/l79594/)عيونك " (http://vb.lamst7b.net/l79594/).. سلامه
شرق الدفا لما - تكونين ب الغرب
.. وغرب الوفا لما .. شرقتي ب وسامه !
بنساك .. لو كنتي السعادة ؟ ولي رب :
.. يعين قلبي ع " (http://vb.lamst7b.net/l79594/)الصبر " (http://vb.lamst7b.net/l79594/)و " (http://vb.lamst7b.net/l79594/)الندامه "
أدري المحبه شيء عاجز به ؟ الطب
.. ومنهو " (http://vb.lamst7b.net/l79594/)يحبك " (http://vb.lamst7b.net/l79594/)ما يلاقي .. مرامه
روحي بعيد ومارسي - لعبة الكذب
.. لي قلب .. طايب خاطره من غرامه
وفيني مشاعر " (http://vb.lamst7b.net/l79594/)وافيه " (http://vb.lamst7b.net/l79594/).. مالها ذنب
.. عفيه " (http://vb.lamst7b.net/l79594/)عليها " (http://vb.lamst7b.net/l79594/)تقابلك .. بإبتسامه
هزمت قلبي ؟ ألف مبروووك يا الحب !
.. مافاز واحد ما " (http://vb.lamst7b.net/l79594/)إعترف " (http://vb.lamst7b.net/l79594/)بإنهزامه
جيتك .. وخلّيت (http://vb.lamst7b.net/l79594/)الكرامه (http://vb.lamst7b.net/l79594/)على ( جنب )
.. وأقفيت أنا خسران (http://vb.lamst7b.net/l79594/): " حب وكرامه " !

محمد بن دوهان

05-25-2010, 03:07 PM

أهلين وسهلين با أبو أحمد ، ونمسي على جميع الحضور الكرام أجمعين ..

خالد حط لنا هالموضوع وقلّب علينا المواجع عقب ما حنا لها ناسين ..

إستلم يا حفيظ السلامة ..

يا أم الوغد يا بعد حيي=إنت ِ لك الله ذبحتيني
إنت ِ تقولين وبخييّ=ما أنساك، وإنتِ نسيتيني ؟؟

سعد العماوي

05-26-2010, 02:38 AM

اهداء لابن دوهان

هلا هلا يا بعد عمري = وافز الى اوحيت طاريها
البطن هايف من الضمري =ولا هن عريضة مثانيها
والنهد يا بيضة القمري = اللي لياليه بالعش رافيها
والقرن الاشقر تقل غمري = من فوق الامتان كاسيها

محمد بن دوهان

05-26-2010, 05:37 AM

السلام عليكم ورحمة الله وبركاته
وإهداء مقبول وواصل من شخص نكن له كل المعزه والمحبة وتسلم وتعيش أخي سعد وسلم الله غاليك ومغليك ، أما الأبيات التي أوردتها فحسب ما سمعت فأول من قالها هو الشيخ حاكم بن مهيد غفر الله له وما أحتفظ به أنه قال :

يالغوش حوفوا على الحمري=ولهـود جينـا محاريـهـا
وش عاد لو هي من السمـري=ربي من الملـح معطيهـا
الخصر هايف من الضمري=ما هن اغـلاض مثانيهـا
والقرن الاشقر تقل غِمري=من فوق الآمتـان كاسيهـا
وأن بحّرت لي يزود امري=بيـض تلاعـج ثمانيهـا

أما بعد ذلك فقد جارى هذه الأبيات الجميله الكثير من الشعراء ..

أعزك الله أخي سعد وسلمك وعافاك

وبإنتظار جديدك وما تجود به من مشاركاتك ومساهمتك المشرفه والكريمة وفقك الله ..

وتقبل من أخيك شكره وتقديره ومحبته لشخصك الكريم .

سعد العماوي

05-26-2010, 06:11 AM

صح نقلك ومشالله عليك يابو عبد العزيز

انا ماصيدي غير تخبر ابي الشيبان تحيا قلوبهم خبرك يحبون قصيد الغزل

طبعا انت منت منهم

ههههههه

سعد العماوي

05-26-2010, 06:18 AM

يابنت صدي عن الشايب= يـم الجهـل لا تشدينـه
لا هو مودي ولا جايـب = وراحت لياليـه وسنينـه
العود عن الهـوى تايـب = يبي يحافظ علـى دينـه

خالد الشويكي

05-26-2010, 08:02 AM

فهد عافت يقول:

ماعـــاد تفرق خذاك الوقت أو جــابك
في الحالتين الموت أقرب من ظلالي !

أما بمــوت من الوله لاطول غيـــابك
ولا بموت من الفرح لا شفتك قبالي !

محمد بن دوهان

05-27-2010, 12:57 AM

سعد خلك صاف مع خالد جوك الشيبان وجاك فنهم ، قام يطلع من أللي مضى

:):):)

كل ما وَن ، قلبي جاوبٍ الضلـوع=من هنوف ٍ سلـب عقلـي هـدب عينهـا
كن فـي عينهـا وان ناظرتـي جمـوع=حفـرة المـوت فـي مقـرن حجاجينهـا
جا نهار الخميس وفات يوم الربوع =والوعـد طـاف والاقــدام مشقينـهـا
حفيت اقدامنـا والعيـن تـذرف دمـوع=فرقا الاحبـاب لـو يوميـن يـا شينهـا
يا مليح الكـلام ويـا حَسِيـن الطبـوع=صـورةٍ حافهـا الرحمـن يـا زينهـا
فيك من ظبي نجد اوصاف وأحسن رموع=وانتـم اللـي كبـود الـنـاس كاوينـهـا
ضامر البطن مـا مسّـه شقـاوه وجـوع=شجـرةٍ عـن سمـوم القيـظ حامينهـا
فوق جم ٍ قـراح وبيـن ذيـك الـزروع=ليـت مـن ذاق مـن خضـرة بساتينـهـا
ومن لحظني وأنا ماشي عن الدرب أتوع=هلـت العـيـن واختـلـت قوانينـهـا
يعجز اليـوم قلبـي عـن شبكّـم يتـوع=شبكـة اللـي مكـسـرةٍ جناحينـهـا

الشاعر خلف بن هذال العتيبي

من هي عنده وين النشاما وين أهل العرفا صبيان السبعه
:):):):)

خالد الشويكي

05-27-2010, 01:54 AM

هههههههه يعطيك العافيه ابن دوهان اختيارات جداً رائعه اشكرك

يقول خالد الفيصل:

يا ما سهر طرفي على حبس عبره

اردهــا والوجـــد للدمــــع جــــذاب

دمعٍ حدر جاله على المنع جـسـره

عظيم وجــدي للدمع شـــّرع الباب

يـــوم وشهر عـــزاه والعمر مـــره

والنــاس واجد لكــن! الولف غلاب

سعد العماوي

05-27-2010, 09:48 AM

عز الله بغيت اقمز العب لحالي

كل ماون قلبي جاوبنه الضلوع = من هنوف سلب عقلي هدب عينها

محمد بن دوهان

05-27-2010, 10:16 AM

والله وسبع تنعام يا أهل العرفا

:):):):)

كانت أول يجيبونها سامري على تلفزيون وإذاعة الكويت

والله طيرت عقول خلق الله يا سعد ..

وإستلم يا سعد إنت وبنآخيك خالد ، هذي بعد للشاعر الكبير خلف بن هذال العتيبي ..

تجر بشتك وسط لندن وانا اشوف =كنك تمشّى وسط سوق المنامـــه
ماتدري ان الدم واضح ومعروف =عليك من دم الخليجي علامـــــه
ومن الحيا تلبس عبايه ونفنــــــوف =لكن ماكملتها باللثامــــــــــــــــــه
يالوف قلبي لوف لوفٍ على لــــوف =لوف العقاب إليا انصرم للحمامه
جتني تهز الخصر والبطن ملهــوف=صدر القطاه وشايلته الزعامـــــــه
اليا أقبلت يمك دخل قلبك الخـــــوف=صويبها ماينقلنّه إعظامــــــــــــه
وأخذ الرصيف وعد بميات وولـوف=ماشي ومن مرك عطاك إبتسامه
ينطحك شقح بكار ومهار وخشــوف=راع الغرام، وجددة له غرامـــــــه
في ديرة في قيضها نلبس الصـــوف=تنزل رذاريذ المطر من غمامـــه
فيها المناكر وابشع الفسق مآلـــوف =ماكن قافيها عذاب وقيامــــــــــــه

وأبي أشوف تاليها معك إنت وخالد

:):):):)

الله يوفقكم ويعزكم يا أعز خلق الله .

خالد الشويكي

05-28-2010, 02:53 AM

ابن دوهان يعطيك العافيه و الله خوش قصيده اول مره اسمعها مع اني متابع لخلف

zzzzzجاري الحفظ بذاكرة المخ الوسطيهzzzzz

طيب خلنا نشوف ناصر الفراعنه وش قال :

كل ماتكبر تزين وكل ماتقدم تجدد

كن نحرها من وراء بوابة الثوب يتهدد

حجم ناحل خصرها في ردفها لاجيت احدد

حجم نقطة نون داخل نون ماتقبل زيادة

بين خصر اشتراكي وردف راس مالي

ويل ويلي شيب عيني طر جيبي ويل حالي

كل غض في نحرها شايف نفسه معالي

والثنين بكل صراحة يستحقون الاشادة

سعد العماوي

05-28-2010, 03:20 AM

للشاعر خالد الكسر

الله يا بــرق ٍ سمر حــــــال دونــه = ناس ٍ حدوني عن حراويه لا أنصاه .
يا مل عين ٍ كـــــــن يلعب بـ نونــه =راموس لاح بـ داخل الجفن و أعماه .
أمس الضــــحى لي ماقـف ٍ تعلمونه =حار الـقـــدم في ماقـفـي ما أتــعــدّاه .
أخيل بــــــرّاق ٍ تـلاعـج إمـزونــه =يا ليت من يقطع ظما الكبد من مــــاه .
هاضـــني ورع ٍ ضواحك إسنونه =درّ ٍ و ياقوت ٍ تـضـمــــــّـه شـفـاياه .
تكفون يا أهل الـــورع لا تنهرونــه =خــــلـّـوه ياقـف لين يكمل مراعـــاه .
أنا هـــواي إصغيـّـر ٍ ما يجونــــــه =ورع ٍ عذاب اللي براســـــه مماراه .
الف صباح الخير قـزّت إعــيــونــه =و الف صباح الخير مـفـلـّـجــات ٍ ثـنـاياه .
والف صباح الخير صـــفـّـة إقرونه =و الف صباح الخير وصفه و حلياه .
زملوق عشب ٍ ناعمات ٍ غـصـــــونه =من وقـع سيله ما وطت به رعـايـاه .

خاص للشيبان

خالد الشويكي

05-30-2010, 04:12 AM

عـــوده مـــره أخـــرى الــر جــاء مـن الجميــع تسجيــل حظــورهــم والمـشـاركـهـ معنا

الصمت هذا الوقت افضل وسيله
اكــــره زحـام حروفهم صدقيني

خـلّي حـــروفك لا بلشتي.. قتيله
حتى ولـــو قالت حـــرام اعتقيني

كنّ الحروف بجوف صدري قبيله
لكـــن !! يقين الوقت خالف يقيني

محمد بن دوهان

05-31-2010, 09:55 PM

لا ياغزال ٍ في محل ٍ خلاوي =عليك من خلي وصوف ٍ قليلات
محجر ورمش ٍ فوق الأوجان ضاوي =وعنق ومخاذع وإلتفات ٍ بصدات
وصفك ووصفه يا غزال متساوي =ويمتاز عنك بعدة أوصاف حلوات
يفرق بعين ٍ مثل عين النداوي =وعليه من شيهانة الشط شارات
سود ٍ عيونه يخلفن الهقاوي =ويثر بصدر مولع القلب دقات
عليه يكويني من الحب كاوي =كي المريض اللي بعد كيته مات
فقير من فقده بشوفه غناوي =يسير في حبه ليال ٍ طويلات
مريض لو يفحص عليّ المداوي =يصعب عليه ويشتبه فالأشاعات
ولو قلت أباخذ فحص قلب وكلاوي =مابان لو منه المعاليق خطرات
جرح ٍ لجا والله على الكل قاوي =علاّم بالبيـّـن وبالمستكنات
الحب نقص بكل قلب ٍ شقاوي =ودواه ما يورد على الصيدليات
ماله علاج ولا طبيب ٍ يداوي =إلا أنت يا راع العيون الكحيلات
يا غصن ريحان ٍ على الحوض راوي =يعدل عليه من المدي عشر مرات
عليه ساق العين ماش ٍ نحاوي =ريـّـان عوده والزماليق غضـّـات
ماله حليٍّ بالحضر والبداوي =ولا بالقرى يوجد ولا بالجزيرات
إلا عليه من الغزيـّـل مهاوي =خشف ٍ من أصوات المصاليع حذرات
وساعة ماشوفه كن جوي خلاوي =كني ورى البيبان دوني خفارات
أعوي عوى ذيب ٍ حدوه الشواوي =مفلس وجار ٍ له من الجوع لوعات

شعر / شقير بن عقيل الجذع

محمد بن دوهان

06-05-2010, 12:23 AM

أقول لظبي مرّ بي وهو راتع=أأنت أخو ليلى فقال يقال
أيا شبه ليلى أن ليلى مريضةٌ=وأنت صحيح، إن ذا لمحال

مجنون ليلى قيس بن الملوح

خالد عبدالعزيز الرسلاني

06-05-2010, 02:24 AM

ياكثر مانذكر من الناس غاليـن"

"تحت الثرى ماعاد فيهم رجوعي

محمد بن دوهان

06-07-2010, 08:49 PM

مساكم الله يالخير يا مجتمع العشاق

لا يروح بالكم بعيد أقصد عشاق الشعر وليس غيره من المخلوقات ..

:):):)
من نوادر الكلمات في الشعر العربي ما قاله الفرزدق غفر الله له وللمسلمين أجمعين حين قال :

إن العيون التي في طرفها مرضٌ=قتلتنا ثم لم يُحيين قتلانا
يصرعنَ ذا اللب حتى لا حراك به=وهنّ أضعفُ خلقِ الله أركانا
أتبعتُها مقلةً إنسانُها غرِقٌ=هل ما ترى تاركُ للعينِ إنسانا

شامخ

06-10-2010, 03:44 PM

بيت يتيم ولا كملته

تونـــي دريــت ان المحبــه توافيــق @@ ماهوب شــرط اللي تحبه يحبــك

محمد بن دوهان

06-10-2010, 03:54 PM

هلا والله بشامخ وصح لسانك وسلمت يا شاعرنا الكريم وأتمنى أن نرى هذا البيت وهو مكتمل في قصيدة جميلة وأن لا يبقى يتيماً وحيداً يقول لك يا طويل العمر :

صغت القوافي الغر من غير تشويش=متبشر باللي لفـت لـه شوابيـش
لما راتـه الشمـس للبـدر قالـت=وخذ الحسن لا منه لك شن ولا ليش
هذا الذي ينفـل علـى كـل جـادل=عـذب السجايـا بـارع بالمجـادل
وان شفت له عرف على المتن جادل=صبرى تنحى ما بقى منه عنديـش

شامخ

06-10-2010, 09:08 PM

يامرحبا يابوعبدالعزيز

جيت أنشد الشَّيخ مير الشَّيخ ما أفتانـي @@ والشَّيخ وجهه بشوش .. ولاضحك سنَّه

سمع سؤالي .. بعـد رحَّـب وحيَّانـي @@ ثم قال : شف شيخ غيري وانشـده عنَّـه

وأنا سؤالي: عن اللي با الهـوى جانـي @@ وأبغى جوابه بحكم الشَّـرع والسُّنَّـة

الآدمي .. لا سرق قلب آدمـي ثانـي @@ هو من هل النَّار ؟ وإلا من هل الجنـة ؟

محمد بن دوهان

06-11-2010, 02:46 AM

بك مهلا إخوي عبد الرزاق وتسلم وتعيش يا عزيزي ، إستلم الله يحفظك ولا يهونون البنيخي

الليالي سهّاري
:):):)

من ناظري دمعي على الخد مسكوب=ومن الحوادث شآب راسي وأنا شاب
لا لذ لي زادٍ ولا حلو مشروب=ولا لموق العين طيب الكرى طاب
لا شك ما يجري على العبد مكتوب=طول الزمان وكل شي ٍ له اسباب
وأنا سبب قتلي ضحا شفت رعبوب=يضحك ويومي لي وهو من ورا الباب
من قبل شوفي له وانا كان أبا توب=وامتركٍ عني هوا تلع الأرقاب
هايف حشا عنقه كما الشاخ مسلوب=والردف عزال ٍ لوسطه وجذّاب
ومبسم كن العسل فيه مذيوب=إن ذاق سلساله ضجيع الهوا طاب
والعين خرسا كنها عين يشبوب=وجدايل من فوق الأمتان سكاب
طرشت أنا لمورد الخد مندوب=يقول لي مرسول معسول الأنياب
ترا خليلك قال لي قل المحبوب=عينه تباري للقمر خامسة غاب
لولا الحيا نطيت من راس مشذوب=وانوح نوح الورق واجيب ما جاب
وقطفت ورد فيه بالناز مكتوب=كالأمس ياسي له إلمن كان طلاب
وخلي سقاني وصله على الدوب=وبنيت له في مسجد القلب محراب

مقطع من قصيدة للأمير الشاعر محسن الهزاني

خالد الشويكي

06-18-2010, 09:32 PM

من يوم فرقانا الى يومنا اليوم
مافات يوم الا وهي مشغلتني

إليا غفيت اشوفها في حلا النوم
واليا صحيت بكل الافكار جتني

عشقتها من قلب ميس ومحروم
وتركتها يوم انها عاندتني

نار تشب بداخل القلب بسموم
حاولت اطفي ضوها واحرقتني

دنيا ثقيلة كلها هموم بهموم
كني حملت جبالها فوق متني

محمد بن دوهان

06-19-2010, 02:06 AM

هلا والله أبو وليد ..

أبيات من قصيدة لأديب ومؤرخ قبائل ربيعة الشاعر عبدالله بن عبار حفظه الله ..

ما طب ديوانك هـل الكـذب والهيـت=مجلس شرف مابـه مغالط ولجـّات
تجمع بـه الـلي للمسولف مصانيـت =لو جاه راعي الثرثرة صار سمّات
يسكت به الثرثار من غيـر تسكيـت=يسمع سوالف تبهج البـال دسمات

وتقبل إعتزازي ومودتي

خالد الشويكي

06-20-2010, 02:24 AM

بعض البشر ودك تحطه بمخباك

وتِظهر خشيمه كل ساعه وتحبه

سعد العماوي

06-20-2010, 09:11 PM

خالد الشويكي حاط بتوقيعه هالقصيده اللي هيضتني لاني توني جاي من سفر قريب

ورأيت ملا يسر اهل الخير من شباب الخليج

فما بالك ونحن بباريس

يامحلا عقب العصر شفة الكيف = في مجلس نعم الشوارب تصكه
اخير من باريس لو قلت وجنيف = من جا لها بكل المعاصي تركه
دار الخنا والفسق وكيف مهو كيف = كيف يخلي عاقل القوم سكه
مار انصحك ياخوي لاياصلك حيف = واليا بغيت انحر طواريف مكه

خالد الشويكي

06-23-2010, 03:19 PM

هههههههههههه

الله يعطيك العافيه ياسعد وصح الله لسانك ولاهنت

نسأل الله العافيه

عليان المجيهمي

06-24-2010, 07:55 PM

لولا الهرم والفقر والثالث المـوت
................ يا الآدمي بالكون يا عظم شانـك

محمد بن دوهان

06-29-2010, 08:02 PM

مادمت من قوم لهم بالوفاء باع=والرجل منهم يسأله طول باعه
لاتصير لسقاط الرجاجيل سماع=بعض الحكي عيب عليك استماعه
ولاترعوي لهروج شاري وبياع=أللي شرا هذا وهذاك باعه
اللي يولعها ورى الناس ولاع =واعراض خلق الله كنها من متاعه
لاعزت الشيمه وسلم العرب ضاع =نزه جنابك واحتفظ بالوداعه
خلك شجاع ودايم الدوم بتاع=وعقلك رزين وفيك عزم وشجاعه
والرجل رجل وبالمهمات جزاع=لو ضيقوا دنياه شاف اتساعه
والحر له في نايف المجد مطلاع =ولايستريح الا بعالي الرفاعه
والديك مسكانه طمان من القاع=ويجفل من ظلاله وعقله رعاعه

سمعتها بإذاعة دولة الكويت ولم أتمكن من معرفة شاعرها للأسف ..

خالد عكاش العلاطي

07-04-2010, 06:36 PM

من روائع الأمير الشاعر محمد بن أحمد السديري رحمه الله
وقد سار بها الركبان وانتشرت بين الناس ....
وهي مليئة بالحكم...
يقول من عدّا على راس عالــــي
.......... رجمٍ طويل يدهله كل قرنــــاس
في راس مرجومٍ عسير المنالـــي
........ تلعبْ به الأرياح مع كل نسْنــاس
في مهمهٍ قفرٍ من النّاس خالــــي
........يشْتاق له من حس بالقلب هوجـاس
قعدت في راسه وحيدٍ لحـالــــي
..........براس الطويل ملابقه تقل حــراس
متذكرٍ في مرقبي وش غدالــــي
...........وصفّقْت بالكفين ياسٍ على يــاس
أخذت أعدّ أيامها والليالـــــــي
............دنيا تقلّب ماعرفنـا لها قيــــاس
كم فرّقت مابين غالي وغالـــــي
..........لو شفت منها ربح ترجع للافــلاس
يقطعك دنيا ماله أول وتالــــــي
.........لوأضحكت! للغبن تقرع بالأجــراس
المستريح اللي من العقل خالــــي
.........ماهو بلجات الهواجيس غطّـــاس
ماهو بمثلي مشكلاته جـــلا لــي
......... أزريت أسجّلهن بحبرٍ وقرطـــاس
حملي ثقيل وشايله باحتمـالــــي
...........واصبرعلى مر الليالي والأتعــاس
وارسي كما ترسي رواسي الجبالــي
............ ولايشتكي ضلعٍ عليه القــدم داس
يابجاد شب النّار وادن الدلالــــي
............ واحمس لنا يابجاد مايقعد الــراس
ودقّه بنجرٍ ياظريف العيالــــــي
............. يجذب لنا ربعٍ على أكوار جــلاس
وزلّه إلى منّه رقد كل سالـــــي
.............. وخلّه يفوح وقنّن الهيل بقيـــاس
وصبّه ومدّه ياكريم السبالـــــي
............. يبعد همومي يوم اشمّـه بالانفـاس
فنجال يغدي ماتصور ببالــــــي
............ وروابع تضرب بها أخْماس وأسداس
لاخاب ظني بالرفيق الموالـــــي
............ مالي مشاريهٍ على نـايد النــــــــاس
لعل قصرٍ مايجيله ظـلالــــــي
.............. ينهد من عالي مبانيه للســــاس
لاصار ماهو مدهلٍ للرجالــــــي
............... وملجا لمن هو يشكي الضيم والياس
بحسناك يامنشي حقوق الخيـالــي
............... ياخالق أجناس ويامفني أجنـــاس
تجعل مقره دارس العهد بــالـــي
................صحْصاح دوٍ دارسٍ مابه اونــاس
البوم في تالي هدامه يلالــــــي
................ جزاك ياقصر الخنا وكر الأدنــاس
متى تربّع دارنا والمفالـــــــي
...............وتخضرّ فياضٍ عقب ماهيب يبّـاس
نشوف فيها الدّيدَحان متـوالــــي
............... مثل الرعاف بخصر مدقوق الألعـاس
ونمشي على البيدا سوات الزوالــي
................ يشرق حماره شرقة الصبغ بالكـاس
وتكبر دفوف معبّسـات الشمالـــي
...............ويبني عليهن الشحم مثل الأطعـاس

خالد الشويكي

09-02-2010, 04:15 AM

تدري وش اللي بالصدر مالها طـب
غلطـــة قريبن بين نـــاسً غريبين

يـــالله قدرني على الطيب يــــارب
مادامني ثــابت على الطيب لـلحين

خالد عكاش العلاطي

12-06-2010, 03:38 PM

لا تهملوا أمر الشبابِ فربَّما صاروا مع الإهمالِ كالألغامِ</span>

محمد بن دوهان

12-08-2010, 12:07 AM

Quote:
المشاركة الأصلية كتبت بواسطة خالد عكاش العلاطي http://www.alsb3ah.net/vb/7-st/buttons/viewpost.gif (http://www.alsb3ah.net/vb/showthread.php?p=24768#post24768)
لا تهملوا أمر الشبابِ فربَّما صاروا مع الإهمالِ كالألغامِ</span>

بكيْتُ على الشّبابِ بدمعِ عيني=فلم يُغنِ البُكاءُ ولا النّحيبُ
فَيا أسَفاً أسِفْتُ على شَبابٍ=نَعاهُ الشّيبُ والرّأسُ الخَضِيبُ
عريتُ منَ الشّبابِ وكنتُ غضاً=كمَا يَعرَى منَ الوَرَقِ القَضيبُ
فيَا لَيتَ الشّبابَ يَعُودُ يَوْماً=فأُخبرَهُ بمَا فَعَلَ المَشيبُ