ياجار لاتزعل..

[عايش بن ساير الشحيتان]

السلام عليكم
بدون مقدمات اخواني الاعضاء في احد الايام بالعمل دخلت المكتب ووجدت زميلي حمودلباح الشمري يكتب وكتب البيت الاول ووقف وقال افزع لي يابو خالد انت مانت خلي من الشعر قلت له ابشر بعزك وش السالفه وقال:
البارح كنت بالاستراحه العب ورقه وعطيت جاري ظهري واخذ بخاطره ان عطيته ظهري وابي كم بيت اعتذر منه وعطاني اسمه واكملت له القصيده
ياجار لاتزعل علي اليوم ياجار @ حيث انك ياجار عزيزن وغالي(بيت حمود)
القصدماهو لعب ياساس الاحرار @ نبي نتسلى دام للعمرتالي(تكملتي)
لعب الورق ياجار ماهو لناكار*@ أنحاش من همٍ وجلسه لحالي
أي الورق وإلا اشتغل شغل سمسار@ مع بايع الذمه بكمن ريالي
ياجار جيرتكم رياحين وأزهـار @ هداج تيما للرفيق الموالي
عسى يابومبارك تقنعك الاعذار@أعرف أنا طبعك وصدرك شمالي
يابن زويمل مسندي واف الاشبار @ من روس شمرمحتمين التوالي
وصلاة ربي عـد ماهـل مدرار @ وأعداد مانشت قنوف الخيالي
على محمد خاتم الرسل الابرار @ رسالته جت من عزيز الجلالي
طبعاً انا ماحب العب الورقه وانتقد الي يلعبها وشلون عاد لو صار شايب
*هنا دقه للي يفهم ان الورق ماهو كار لنا وخصوصا الشيبان.
وسلامتكم.

[خالد عكاش العلاطي]

يعطيك العافيه على هذه القصيده الجميله وهذا ينبع من اخلاقك بالأعتذار له

[محمد بن دوهان]

صح لسانك وبنانك اخوي عايش ولسان الشاعر حمود دلباح ويقدر له هذه المشاعر الكريمة والطيبة تجاه جاره ..

وما شاء الله عليك أثاريك شاعر يا بنآخي ومخفي نفسك عنا ..

ننتظر ما تجود به من إبداع بوح قلمك وفقك الله .

[ابو شامه]

صح لسانك وان شاء الله الجار قبل العذر

والورقه يسمونها مفرقة المجالس

[عايش بن ساير الشحيتان]

الاقتباس غير متاح حاليا
اشكرك على المرور اخوي خالد عكاش

[عايش بن ساير الشحيتان]

صح بدانك يابن دوهان
وكل عود به دخان
وانشالله راح انشركل محاولاتي الشعريه في هذا المنتدى
غالي والطلب رخيص يابناخي.

[عايش بن ساير الشحيتان]

صح ابدانك اخوي ابو شامه
وصحيح ان الورقه مفرقة مجالس وهي اصلا لعبة مساجين بس هذولا الي يلعبونها اعتقد انهم مساجين الحريه(مساجين بدون سجن) والمشكله انها لاتخلو من سب وشتم في اغلب الاحيان والادها والامر ان المرض انتقل من الشباب الشياب فتجد الواحد تارك عياله داشرين بالشوارع ويلعب ورقه بالاستراحه ياخي اذا بليتوا فاستتروا اذا ودك تلعب ورقه ضروري خلاص العب ولكن بالبيت كي يكونون الاولاد تحت انضارك & أو خذهم معك للاستراحه ولا تهرب منهم ومن مسؤليتهم.
أصلح الله شياب الامه قبل شبابها.

[ابو شامه]

فعلاً اخي عايش انتقلت العدوى الى الشيبان لكن الله يهديهم جميعاً

[عبدالعزيز المعني]

اها ابو خالد انت شاعر ولا اعلم تراه بو خالد زميل عمل ونعم المخوه

صح لسانك قصيده وافيه للرد ع الموقف

[عايش بن ساير الشحيتان]

ماعليك زود يابو احمد
نورت بمرورك